کراچی: نیب کراچی نے مشترکہ مسابقتی امتحان 2023 (سی سی ای 2023) میں مبینہ بدعنوانی اور بے ضابطگیوں کی تحقیقات شروع کردی ہیں۔ قومی احتساب بیورو نے سندھ پبلک سروس کمیشن (ایس پی ایس سی) کو طلبی نوٹس جاری کردیا ہے۔
نیب کے ترجمان کے مطابق نوٹس قومی احتساب آرڈیننس 1999 کی دفعہ 19 کے تحت جاری کیا گیا۔ بیورو نے ایک قابلِ اعتماد شکایت موصول ہونے کے بعد دفعہ 18(ب) کے تحت معاملے کا نوٹس لیا۔
ایس پی ایس سی سے ریکارڈ طلب
نوٹس میں ایس پی ایس سی حیدرآباد کے سیکریٹری کو ہدایت کی گئی ہے کہ وہ امتحانی عمل سے متعلق جامع ریکارڈ فراہم کریں۔
کمیشن کو متعلقہ قوانین اور قواعد سے واقف، بی پی ایس 18 یا اس سے اعلیٰ گریڈ کے افسر کو نامزد کرنے کی ہدایت بھی دی گئی ہے۔ نامزد افسر کو 20 اکتوبر 2026 کو نیب کراچی کے دفتر میں مشترکہ تحقیقاتی ٹیم کے سامنے ذاتی طور پر پیش ہونا ہوگا۔
امتحانی قواعد اور نتائج کی تفصیلات طلب
نیب نے امتحانی عمل کی قانونی حیثیت جانچنے کے لیے متعدد دستاویزات طلب کی ہیں۔ ان میں امیدواروں کی اہلیت، کوٹہ پالیسی، قواعد و ضوابط اور سی سی ای 2023 کے لیے جاری کردہ اشتہارات شامل ہیں۔
بیورو نے 2 فروری 2026 کو اعلان کردہ امتحانی نتائج، ہر کیڈر میں اعلان شدہ اور تقرری کے لیے تجویز کردہ آسامیوں کی تعداد بھی طلب کی ہے۔
اس کے علاوہ کوٹہ وار آسامیوں کی تفصیلات اور اسکریننگ ٹیسٹ و تحریری امتحان پاس کرنے والے امیدواروں کا ریکارڈ بھی مانگا گیا ہے۔
اقرار الحسن کیس: عدالت نے 4 روزہ جسمانی ریمانڈ پر این سی سی آئی اے کے حوالے کردیا
میرٹ، الاٹمنٹ اور انٹرویو کا ریکارڈ
نوٹس کے مطابق نیب نے امیدواروں کے میرٹ اور آسامیوں کی الاٹمنٹ سے متعلق رپورٹ طلب کی ہے۔ اس میں استعمال کیے گئے قواعد، فارمولے اور حسابات بھی شامل ہوں گے۔
انٹرویو کمیٹی کے ارکان کی تفصیلات، امیدواروں کی تشخیصی شیٹس، انٹرویو کی ویڈیو ریکارڈنگز اور متعلقہ فائلیں بھی فراہم کرنا ہوں گی۔
نیب نے تقرری کے نوٹیفکیشنز، جوائننگ رپورٹس اور چارج سنبھالنے یا چھوڑنے سے متعلق دستاویزات بھی طلب کی ہیں۔ تحریری امتحان میں شریک اور انٹرویو کے لیے اہل قرار پانے والے ہر امیدوار کی الگ فائل بھی طلب کی گئی ہے۔
ریکارڈ فراہم نہ کرنے پر کارروائی کی تنبیہ
نیب نے نوٹس میں خبردار کیا ہے کہ ہدایات پر عمل نہ کرنے کو تحقیقات میں رکاوٹ ڈالنے یا انہیں ناکام بنانے کی دانستہ کوشش تصور کیا جاسکتا ہے۔
نوٹس کے مطابق ایسی صورت میں قومی احتساب آرڈیننس 1999 کی دفعہ 31 کے تحت قانونی کارروائی ہوسکتی ہے، جس میں زیادہ سے زیادہ 10 سال قید کی سزا کا ذکر کیا گیا ہے۔
