لاہور: امیر جماعت اسلامی پاکستان حافظ نعیم الرحمان نے کہا ہے کہ جماعت اسلامی کا دھرنا کسی فرد کے خلاف نہیں بلکہ 25 کروڑ عوام کے حقوق کے لیے ہے۔ انہوں نے مطالبات کی منظوری تک احتجاج جاری رکھنے کا اعلان کیا۔
لاہور میں میڈیا سے گفتگو کرتے ہوئے حافظ نعیم الرحمان نے کہا کہ بجلی کے بھاری بلوں میں بے تحاشا ٹیکس شامل ہیں۔ ان کے مطابق آئی پی پیز میں سیاستدانوں کی شمولیت کے معاملے کا فرانزک آڈٹ ہونا چاہیے تاکہ حقائق عوام کے سامنے آسکیں۔
انہوں نے الزام عائد کیا کہ بجلی کی پیداوار کے معاملے میں بھی بے ضابطگیاں ہوئی ہیں۔ حافظ نعیم کے مطابق ایف بی آر میں ہر سال 1300 ارب روپے کی کرپشن ہوتی ہے اور آڈٹ میں یہ بات سامنے آئی ہے۔
حافظ نعیم الرحمان نے کہا کہ حکومت نے بریفنگ کے لیے کمیٹی تشکیل دی ہے، تاہم جماعت اسلامی صرف بریفنگ نہیں سنے گی۔ ان کے مطابق جو حکام اپنا مؤقف پیش کرنا چاہتے ہیں، وہ دھرنے میں آکر بات کریں۔
مکہ دفاعی معاہدہ: شہباز شریف نے ٹرمپ کی حمایت اور قیادت کو سراہا
پٹرولیم مصنوعات کی قیمتوں پر مطالبہ
اس سے قبل احتجاجی کارکنوں سے خطاب کرتے ہوئے حافظ نعیم الرحمان نے مطالبہ کیا کہ پٹرولیم لیوی ختم کرکے پٹرول کی قیمت 225 روپے فی لیٹر کی جائے۔
انہوں نے کہا کہ حکومت پٹرول کی قیمت اور اس پر عائد ٹیکس دونوں بڑھا رہی ہے۔ ان کے مطابق پٹرول کی قیمتوں میں مسلسل اضافہ عوام پر اضافی بوجھ ڈال رہا ہے۔
حافظ نعیم الرحمان نے کہا کہ وزیراعلیٰ ہاؤس کے باہر دھرنا وفاقی اور صوبائی حکومت کے خلاف احتجاج ہے۔ انہوں نے خبردار کیا کہ حکومت نے احتجاج روکنے کی کوشش کی تو تحریک حکومت مخالف تحریک میں تبدیل ہوسکتی ہے۔
امیر جماعت اسلامی نے اعلان کیا کہ احتجاجی دھرنے میں خواتین بھی شامل ہوں گی۔
