کراچی: میٹرک بورڈ کراچی کے چیئرمین مشرف علی راجپوت سے آل پاکستان کلرکس ایسوسی ایشن (ایپکا) کے وفد نے ملاقات کی۔ وفد نے میٹرک سائنس گروپ 2026 کے نتائج شفاف اور مختصر وقت میں جاری کرنے پر انہیں شیلڈ پیش کی۔
ایپکا کا وفد سید توقیر حسین شاہ کی قیادت میں چیئرمین سے ملا۔ وفد میں بورڈ ملازمین اور تنظیم کے دیگر عہدیدار بھی شامل تھے۔ ملاقات میں امتحانی نظام، نتائج اور ملازمین کے امور پر تبادلۂ خیال کیا گیا۔
چیئرمین مشرف علی راجپوت نے کہا کہ میٹرک سائنس گروپ کے نتائج بروقت جاری کرنا اجتماعی کوششوں کا نتیجہ ہے۔ انہوں نے اساتذہ اور بورڈ ملازمین کے تعاون کو بھی سراہا۔
تجاوزات: صدر ٹاؤن میں بڑا آپریشن، سڑکیں اور فٹ پاتھ خالی کرا دیے گئے
انہوں نے بتایا کہ نویں جماعت سائنس اور جنرل گروپ، ریگولر اور پرائیویٹ، کے نتائج بھی ماضی کے مقابلے میں پہلے جاری کرنے کی کوشش کی جا رہی ہے۔
چیئرمین نے کہا کہ بورڈ ملازمین کے مسائل ترجیحی بنیادوں پر حل کیے جا رہے ہیں۔ ان کے مطابق سینیارٹی کم فٹنس کی بنیاد پر ترقیوں کا عمل جلد شروع کیا جائے گا۔
انہوں نے کہا کہ ڈیلی ویجز ملازمین کے معاوضوں میں اضافے کی تجویز زیر غور ہے۔ فوتگی کوٹہ پر عمل درآمد بھی جلد کیا جائے گا۔ دیگر انتظامی امور پر بھی مثبت پیش رفت جاری ہے۔
ایپکا کے وفد نے امتحانی نتائج کی بروقت تیاری اور انتظامی اقدامات کو سراہا۔ وفد نے امید ظاہر کی کہ ملازمین کے مسائل بھی جلد حل ہوں گے۔
