9 محرم جلوس کے سلسلے میں مرکزی مجلس صبح 10 بجے نشتر پارک میں منعقد ہوئی، جس سے علامہ شہنشاہ حسین نقوی نے خطاب کیا۔
مجلس کے اختتام کے بعد مرکزی جلوس دوپہر ایک بجے نشتر پارک سے برآمد ہوگا۔
جلوس اپنے روایتی راستوں سے گزرے گا۔
عزادار ایم اے جناح روڈ پر واقع امام بارگاہ علی رضا کے سامنے نمازِ ظہرین ادا کریں گے۔
بعد ازاں جلوس کھارادر میں حسینیہ ایرانیاں پہنچ کر اختتام پذیر ہوگا۔
ترجمان کراچی پولیس کے مطابق جلوس کی سکیورٹی کے لیے خصوصی انتظامات کیے گئے ہیں۔
انہوں نے بتایا کہ پانچ ہزار سے زائد پولیس افسران اور اہلکار ڈیوٹی انجام دے رہے ہیں۔
پولیس نے جلوس کے راستوں اور حساس مقامات پر اضافی نفری بھی تعینات کی ہے۔
سکیورٹی پلان کے تحت جلوس کی گزرگاہوں سے ملحقہ گلیاں اور سڑکیں بند کر دی گئی ہیں۔
متعدد مارکیٹوں اور دکانوں کو بھی کنٹینرز لگا کر سیل کیا گیا ہے۔
حکام کے مطابق یہ اقدامات امن و امان برقرار رکھنے کے لیے کیے گئے ہیں۔
دوسری جانب نشتر پارک اور اس کے اطراف میں موبائل فون سروس معطل کر دی گئی ہے۔
موبائل سروس کی بندش کے باعث شہریوں کو رابطے میں مشکلات کا سامنا ہے۔