کراچی: 8 محرم الحرام کے موقع پر ایڈیشنل آئی جی کراچی نے ضلع کیماڑی کے مختلف حساس مقامات کا دورہ کیا اور سیکیورٹی انتظامات کا تفصیلی جائزہ لیا۔ اس دوران انہوں نے امریکی قونصل خانے کی سیکیورٹی کا بھی معائنہ کیا تاکہ حفاظتی اقدامات کی مؤثریت کو یقینی بنایا جا سکے۔
دورے کے موقع پر ڈی آئی جی ساؤتھ زون، ایس ایس پی کیماڑی اور ایس پی فارن سیکیورٹی سیل نے ایڈیشنل آئی جی کراچی کو امریکی قونصل خانے اور دیگر اہم تنصیبات کی سیکیورٹی کے حوالے سے تفصیلی بریفنگ دی۔ حکام نے انہیں تعینات نفری، نگرانی کے نظام اور ہنگامی صورتحال سے نمٹنے کے لیے کیے گئے انتظامات سے آگاہ کیا۔
پولیس حکام کے مطابق 8 محرم الحرام کے سلسلے میں ضلع کیماڑی کی تمام امام بارگاہوں، مجالس، جلوسوں اور دیگر اہم مقامات کی حفاظت کے لیے خصوصی سیکیورٹی پلان نافذ کیا گیا ہے۔ سیکیورٹی اہلکاروں کی اضافی تعیناتی کے ساتھ حساس مقامات کی مسلسل نگرانی بھی جاری ہے۔
ایس ایس پی کیماڑی خود سیکیورٹی انتظامات کی نگرانی کر رہے ہیں جبکہ ضلع کیماڑی پولیس کسی بھی ممکنہ ہنگامی صورتحال سے نمٹنے اور فول پروف سیکیورٹی یقینی بنانے کے لیے متحرک ہے۔ پولیس حکام کا کہنا ہے کہ محرم الحرام کے دوران امن و امان برقرار رکھنے کے لیے تمام دستیاب وسائل بروئے کار لائے جا رہے ہیں۔
