اسٹریٹ کرائم: فریئر پولیس کی کارروائی، موٹر سائیکل لفٹرز کا پانچ رکنی گینگ گرفتار

کراچی میں اسٹریٹ کرائم کے خلاف کارروائی کے دوران ڈسٹرکٹ ساؤتھ فریئر پولیس نے بڑی کامیابی حاصل کرتے ہوئے موٹر سائیکل لفٹنگ میں ملوث پانچ رکنی گینگ کو گرفتار کر لیا۔

پولیس حکام کے مطابق یہ کارروائی فریئر تھانے کی حدود میں کی گئی، جہاں ملزمان کو جدید انٹیلی جنس معلومات کی بنیاد پر گرفتار کیا گیا۔ گرفتار افراد سے غیر قانونی اسلحہ اور دو چوری شدہ موٹر سائیکلیں برآمد ہوئیں۔

برآمد ہونے والی موٹر سائیکلیں تھانہ فریئر اور تھانہ پریڈی کی حدود سے چوری کی گئی تھیں، جن کی تصدیق کے بعد انہیں مالکان سے متعلقہ کارروائی کے لیے محفوظ کر لیا گیا ہے۔ پولیس نے مزید تحقیقات کا آغاز کر دیا ہے۔

گرفتار ملزمان کی شناخت ابرارالرحمن، شاہ میر، محمد شہروز عرف شاکا، نوفل یوسف اور عبدالقیوم عرف بلال عرف چھٹا کے ناموں سے ہوئی ہے۔ ابتدائی تفتیش میں بعض اہم انکشافات سامنے آئے ہیں، تاہم مکمل تفصیلات تفتیشی عمل کے بعد جاری کی جائیں گی۔

پولیس کے مطابق ملزمان کو مزید تفتیش کے لیے انویسٹی گیشن برانچ اور اے وی ایل سی حکام کے حوالے کر دیا گیا ہے تاکہ اس گروہ کے دیگر نیٹ ورکس اور ممکنہ ساتھیوں کا سراغ لگایا جا سکے۔

حکام کا کہنا ہے کہ شہر میں اسٹریٹ کرائم کے خلاف کارروائیاں مزید تیز کی جا رہی ہیں اور ایسے جرائم پیشہ عناصر کے خلاف بلاامتیاز کریک ڈاؤن جاری رہے گا۔