کراچی میں وزیراعلیٰ سندھ Syed Murad Ali Shah کی زیر صدارت کابینہ اجلاس منعقد ہوا جس میں صحت کے شعبے سے متعلق چار اہم ایجنڈا نکات کی منظوری دے دی گئی۔
اجلاس میں جناح پوسٹ گریجویٹ میڈیکل سینٹر اور نیشنل انسٹی ٹیوٹ آف چائلڈ ہیلتھ سے متعلق “آپریشن اینڈ مینجمنٹ ایکٹ 2025” کے مسودے کی منظوری دی گئی، جس کے بعد دونوں اداروں کے انتظامی اختیارات سندھ حکومت کو منتقل کرنے کی راہ ہموار ہوگئی۔
کابینہ کو بتایا گیا کہ این آئی سی وی ڈی پہلے ہی صوبائی قانونی فریم ورک کے تحت کام کر رہا ہے، جبکہ وفاق سے منتقل ہونے والے اداروں کے لیے نیا انتظامی ڈھانچہ بھی منظور کیا گیا ہے۔
اجلاس میں ان اداروں کے لیے ایگزیکٹو ڈائریکٹر کی تقرری کے قواعد، عہدے سے ہٹانے کا طریقہ کار اور وفاقی وزارتِ صحت کے جوائنٹ سیکریٹری کو بورڈ میں شامل کرنے کی بھی منظوری دی گئی۔
مزید برآں کابینہ نے ادویات کی مسلسل فراہمی کے لیے الیکٹرانک پروکیورمنٹ سسٹم (EPADS) جاری رکھنے کا فیصلہ کیا اور مالی سال 2026-27 کے لیے ادویات و میڈیکل کٹس کی خریداری کے نظام کو برقرار رکھنے کی منظوری دی۔
کابینہ نے سندھ پوسٹ گریجویٹ ریزیڈنسی پالیسی 2026 بھی منظور کی، جس کے تحت تمام سرکاری میڈیکل یونیورسٹیز میں مرکزی داخلہ ٹیسٹ اور یکساں میرٹ نظام نافذ کیا جائے گا۔
اجلاس میں 3794 تربیتی نشستوں کے لیے 4 ارب 73 کروڑ 90 لاکھ روپے مختص کیے گئے جبکہ پوسٹ گریجویٹ تربیت میں شفافیت اور میرٹ کو یقینی بنانے کے لیے صوبائی کمیٹی کے قیام کی بھی منظوری دی گئی۔
کابینہ نے یہ بھی فیصلہ کیا کہ پسماندہ علاقوں میں خدمات انجام دینے والے ڈاکٹروں کو اضافی میرٹ ویٹیج دیا جائے گا جبکہ تربیتی پروگرام ادھورا چھوڑنے والوں پر پابندیاں اور مالی جرمانے بھی عائد ہوں گے۔
اجلاس میں سندھ سیف بلڈ ٹرانسفیوژن ترمیمی ایکٹ 2026 کی منظوری بھی دی گئی جس کے تحت ادارے کے سربراہ کے لیے اہلیت کے معیار میں توسیع کی گئی ہے۔
وزیراعلیٰ سندھ نے اجلاس میں کہا کہ صحت کے شعبے میں یہ اصلاحات عوام کو بہتر سہولیات کی فراہمی اور ادارہ جاتی شفافیت کے لیے اہم سنگ میل ثابت ہوں گی۔