جنرل ہیڈ کوارٹرز (جی ایچ کیو) راولپنڈی میں بھارتی جارحیت کے جواب میں کیے گئے تاریخی آپریشن “بنیان المرصوص” اور “معرکۂ حق” کی پہلی سالگرہ کے موقع پر ایک شاندار اور پروقار تقریب منعقد ہوئی، جس میں مسلح افواج کی اعلیٰ قیادت، شہداء کے اہل خانہ اور عسکری حکام نے بڑی تعداد میں شرکت کی۔
ڈھاکہ میں پاک-بنگلہ دیش کرکٹ تعلقات کے فروغ کے لیے اعلیٰ سطحی ملاقات اور عشائیہ، باہمی تعاون بڑھانے پر اتفاق
تقریب کے مہمانِ خصوصی چیف آف ڈیفنس فورسز فیلڈ مارشل سید عاصم منیر تھے جنہوں نے یادگارِ شہداء پر حاضری دی، پھولوں کی چادر چڑھائی اور ملک کے دفاع میں جانوں کا نذرانہ پیش کرنے والے شہداء کے درجات کی بلندی کے لیے دعا کی۔ اس موقع پر پاک فوج، پاک فضائیہ اور پاک بحریہ کے سربراہان بھی ان کے ہمراہ موجود تھے۔
ایئر چیف مارشل ظہیر احمد بابر سدھو اور پاک بحریہ کے سربراہ ایڈمرل نوید اشرف نے بھی یادگارِ شہداء پر پھول رکھے اور کہا کہ شہداء کی قربانیاں قوم کے لیے ہمیشہ مشعلِ راہ رہیں گی۔
تقریب میں اس عزم کا اظہار کیا گیا کہ پاکستان کے دفاع کے لیے کسی بھی قربانی سے دریغ نہیں کیا جائے گا اور دشمن کی ہر جارحیت کا فیصلہ کن جواب دیا جائے گا۔
اس موقع پر ملک بھر میں “معرکۂ حق” کی پہلی سالگرہ بھرپور قومی جوش و جذبے کے ساتھ منائی گئی اور مختلف مقامات پر شہداء کو خراجِ عقیدت پیش کرنے کے لیے تقاریب منعقد ہوئیں۔
صدر مملکت کا پیغام
صدر مملکت آصف علی زرداری نے اپنے پیغام میں کہا کہ معرکۂ حق میں پاکستان کا ردعمل متوازن، مؤثر اور پیشہ ورانہ تھا۔ انہوں نے کہا کہ دشمن کی جارحیت کے باوجود قوم نے غیر معمولی اتحاد کا مظاہرہ کیا اور مسلح افواج کے ساتھ کھڑی رہی۔
وزیراعظم کا پیغام
وزیراعظم شہباز شریف نے کہا کہ یہ دن اللہ تعالیٰ کے شکر اور شہداء کی قربانیوں کو یاد کرنے کا دن ہے۔ انہوں نے کہا کہ پاکستان نے زمین، فضا، سمندر اور سائبر محاذ پر دشمن کو مؤثر جواب دے کر اپنی دفاعی صلاحیت ثابت کی۔
عسکری قیادت کا مؤقف
آئی ایس پی آر کے مطابق مسلح افواج نے اس دن کو اتحاد، قربانی اور پیشہ ورانہ مہارت کی علامت قرار دیتے ہوئے کہا کہ “معرکۂ حق” نے دشمن کے جھوٹے پروپیگنڈے کو بے نقاب کر دیا اور پاکستان کی دفاعی برتری کو دنیا کے سامنے واضح کیا۔