پاک ترک مشترکہ کمانڈو اور اسپیشل فورسز کی عسکری مشق “جناح 13” ترکی میں کامیابی کے ساتھ اختتام پذیر ہو گئی ہے۔ پاک فوج کے شعبہ تعلقات عامہ (آئی ایس پی آر) کے مطابق اس مشق کا بنیادی مقصد پاکستان اور ترکی کی مسلح افواج کے درمیان پیشہ ورانہ مہارت، باہمی ہم آہنگی اور دفاعی تعاون کو مزید فروغ دینا تھا۔
واشنگٹن ٹائمز کا پاکستان کے آپریشن “غضبِ للحق” پر مثبت تجزیہ، دہشت گردی کے خلاف مؤثر حکمت عملی قرار
آئی ایس پی آر کے مطابق یہ مشق انسدادِ دہشت گردی کے جدید تقاضوں کے مطابق ترتیب دی گئی تھی جس میں خاص طور پر شہری علاقوں میں آپریشنز، دشمن عناصر کے خلاف فوری ردعمل اور دیسی ساختہ دھماکہ خیز مواد (IEDs) سے نمٹنے کی تکنیکوں پر عملی تربیت فراہم کی گئی۔ دونوں ممالک کے کمانڈوز نے مشترکہ طور پر مختلف جنگی مشقوں میں حصہ لیا اور اعلیٰ پیشہ ورانہ مہارت کا مظاہرہ کیا۔
مشق کے دوران شرکاء کو جدید جنگی حکمت عملی، انٹیلی جنس بیسڈ آپریشنز اور شہری علاقوں میں پیچیدہ صورتحال سے نمٹنے کے طریقہ کار پر عملی تربیت دی گئی۔ یہ تمام سرگرمیاں ترکی کے مختلف تربیتی مراکز، جن میں انقرہ اور اسپارٹا شامل ہیں، میں منعقد ہوئیں۔
ترجمان پاک فوج کے مطابق اس مشق نے نہ صرف عسکری تربیت کے اہداف حاصل کیے بلکہ دونوں ممالک کے درمیان دفاعی سفارت کاری کو بھی مزید مضبوط بنایا ہے۔ اس موقع پر پاک ترک افواج نے اس عزم کا اعادہ کیا کہ وہ خطے میں امن و استحکام اور انسداد دہشت گردی کے لیے باہمی تعاون کو مزید وسعت دیں گے۔
مشق “جناح 13” کو دونوں ممالک کے درمیان تاریخی اور برادرانہ تعلقات کا مظہر قرار دیتے ہوئے کہا گیا کہ یہ مشق مستقبل میں مشترکہ دفاعی حکمت عملی اور فوجی تعاون کے نئے دروازے کھولے گی۔