اسلام آباد: عالمی کشیدگی اور بین الاقوامی منڈی میں خام تیل کی قیمتوں میں اتار چڑھاؤ کے تناظر میں حکومت نے ملک بھر میں پیٹرولیم مصنوعات کی بلا تعطل فراہمی یقینی بنانے کے لیے ہنگامی نوعیت کے اقدامات شروع کر دیے ہیں۔
Oil and Gas Regulatory Authority (اوگرا) کے مطابق قیمتوں میں غیر یقینی صورتحال کے دوران ذخیرہ اندوزی کی حوصلہ شکنی کرنے کا فیصلہ کیا گیا ہے تاکہ مارکیٹ میں مصنوعی قلت پیدا نہ ہو اور صارفین کو مشکلات کا سامنا نہ کرنا پڑے۔
اوگرا کا کہنا ہے کہ آئل مارکیٹنگ کمپنیاں عارضی طور پر سپلائی کو ریگولیٹ کر سکیں گی تاکہ طلب اور رسد میں توازن برقرار رکھا جا سکے۔ ریگولیٹر کے مطابق ریٹیل آؤٹ لیٹس کو ماضی کی فروخت کے تناسب سے پیٹرول اور ڈیزل فراہم کیا جائے گا تاکہ کسی مخصوص علاقے میں غیر معمولی دباؤ پیدا نہ ہو۔
ادارے نے واضح کیا ہے کہ سپلائی مینجمنٹ کا یہ اقدام نظام میں استحکام برقرار رکھنے کے لیے معمول کی ریگولیٹری کارروائی کا حصہ ہے اور اس کا مقصد کسی بھی ممکنہ بے چینی یا افواہوں کے باعث پیدا ہونے والی غیر ضروری خریداری کو روکنا ہے۔
اوگرا کے مطابق ملک میں پیٹرول اور ڈیزل کے وافر ذخائر موجود ہیں اور کسی قسم کی قلت کا خدشہ نہیں۔ حکام کا کہنا ہے کہ درآمدی شیڈول اور ریفائنری آپریشن معمول کے مطابق جاری ہیں، جس سے قومی ضروریات پوری کی جا رہی ہیں۔
ادارے نے عوام سے اپیل کی ہے کہ وہ افواہوں پر کان نہ دھریں اور غیر ضروری ذخیرہ اندوزی یا اضافی خریداری سے گریز کریں، کیونکہ اس سے سپلائی چین پر دباؤ بڑھ سکتا ہے۔
توانائی ماہرین کا کہنا ہے کہ عالمی حالات کے باعث احتیاطی انتظامات معمول کا حصہ ہوتے ہیں اور ان کا مقصد مارکیٹ میں استحکام برقرار رکھنا ہوتا ہے۔