وزیراعلیٰ سندھ سید مراد علی شاہ نے بیکن ہاؤس کے قیام کے 50 سال مکمل ہونے پر منعقدہ گولڈن جوبلی تقریب سے خطاب کرتے ہوئے ادارے کی تعلیمی خدمات، معیار اور وژنری قیادت کو زبردست خراجِ تحسین پیش کیا۔ وزیراعلیٰ نے اپنی تقریر کے آغاز میں گل پلازہ سانحے کے شہداء کے لیے دعا کی اور لواحقین سے اظہارِ تعزیت کیا۔
جامعہ کراچی کی اراضی پر قائم غیرقانونی پیٹرول پمپ کا این او سی منسوخ، مزید کارروائی کا اعلان
وزیراعلیٰ سندھ نے کہا کہ بیکن ہاؤس کا سفر 1975 میں صرف 19 بچوں پر مشتمل ایک مونٹیسوری اسکول سے شروع ہوا اور آج یہ دنیا کے بڑے تعلیمی نیٹ ورکس میں شمار ہوتا ہے، جہاں چار لاکھ سے زائد طلبہ زیرِ تعلیم ہیں۔ انہوں نے چیئرپرسن بیکن ہاؤس محترمہ نسرین محمود قصوری کی وژنری قیادت کو سراہتے ہوئے کہا کہ ادارے نے تعلیم میں تسلسل، معیار اور جدت کی شاندار مثال قائم کی ہے۔
سید مراد علی شاہ کا کہنا تھا کہ بیکن ہاؤس کا 50 سالہ تعلیمی سفر استقامت، عصری تقاضوں سے ہم آہنگی اور معیار پر سمجھوتہ نہ کرنے کا ثبوت ہے۔ انہوں نے کہا کہ آزادی کے بعد تعلیم ایک محدود طبقے تک تھی، مگر بیکن ہاؤس نے معیاری تعلیم کو عام کیا اور وسعت، رسائی اور تدریسی معیار میں نئے معیارات متعارف کرائے۔
وزیراعلیٰ سندھ نے کہا کہ بیکن ہاؤس نے ملک بھر میں تدریسی معیار کو بہتر بنانے کے ساتھ ساتھ ہزاروں خواتین کو اساتذہ، قائدین اور تعلیمی منتظمین کے طور پر بااختیار بنایا۔ ان کے مطابق بیکن ہاؤس میں 18 ہزار سے زائد ملازمین کام کر رہے ہیں جن میں اکثریت خواتین کی ہے، جو نجی شعبے میں خواتین کو روزگار فراہم کرنے کی ایک نمایاں مثال ہے۔
انہوں نے بتایا کہ بیکن ہاؤس پاکستان کے تمام صوبوں اور آزاد جموں و کشمیر میں تعلیمی خدمات انجام دے رہا ہے اور معیاری نصاب کے ذریعے قومی یکجہتی کو فروغ دے رہا ہے۔ دی ایجوکیٹرز جیسے منصوبوں کے ذریعے کم آمدنی والے طبقے کو سستی اور منظم تعلیم فراہم کی گئی، جسے وزیر اعلیٰ نے ایک اہم سماجی خدمت قرار دیا۔
وزیراعلیٰ سندھ نے کہا کہ بیکن ہاؤس نے عالمی سطح پر پاکستان کا مثبت تشخص اجاگر کیا اور بین الاقوامی فورمز پر اس کی تعلیمی خدمات کو سراہا گیا۔ انہوں نے واضح کیا کہ سندھ حکومت تعلیم تک رسائی کو اپنی اولین ترجیح بنا رہی ہے، جس میں اساتذہ کے معیار کی بہتری اور آؤٹ آف اسکول بچوں کا اندراج شامل ہے۔
انہوں نے کہا کہ بیکن ہاؤس سندھ حکومت کے تعلیمی اہداف میں ایک مؤثر شراکت دار ہے اور سرکاری و نجی اشتراک سے تعلیم کو ترقی کا طاقتور ذریعہ بنایا جا رہا ہے۔ وزیراعلیٰ نے بیکن ہاؤس کی گولڈن جوبلی کے موقع پر شائع ہونے والی یادگاری کتاب کو خوش آئند قرار دیتے ہوئے کہا کہ یہ کتاب خطے کی کہانیوں، اقدار اور روایات کو محفوظ کرے گی۔
آخر میں وزیراعلیٰ سندھ سید مراد علی شاہ نے بیکن ہاؤس کو 50 سال مکمل ہونے پر دلی مبارکباد پیش کرتے ہوئے اسے قیادت، عوامی خدمت اور تعلیمی استقامت کی روشن مثال قرار دیا۔