خبر رساں ادارے رائٹرز کے مطابق اقوامِ متحدہ کی سلامتی کونسل نے امریکا کی پیش کردہ قرارداد جمعرات کو منظور کرلی، جس کے تحت شام کے وزیر داخلہ انس خطاب سمیت متعدد شخصیات پر عائد پابندیاں ختم کر دی گئیں۔ قرارداد کے حق میں 14 ووٹ آئے جبکہ چین نے ووٹنگ میں حصہ نہیں لیا۔
گھوٹکی کے کچے علاقے رونتی میں پولیس آپریشن فائرنگ کے تبادلے میں 12 ڈاکو ہلاک
امریکا کئی ماہ سے 15 رکنی سلامتی کونسل پر زور دے رہا تھا کہ شام پر عائد اقتصادی اور سفری پابندیوں میں نرمی کی جائے۔ امریکی صدر ڈونلڈ ٹرمپ نے مئی میں اعلان کیا تھا کہ امریکا اپنی شام سے متعلق پالیسی میں بڑی تبدیلی لا رہا ہے اور پابندیاں ختم کی جائیں گی۔
ٹرمپ نے جمعرات کو صحافیوں سے گفتگو میں کہا کہ:
"میرا خیال ہے کہ وہ (الشرع) بہت اچھا کام کر رہے ہیں۔ یہ ایک مشکل خطہ ہے مگر میں نے ان سے اچھی بات چیت کی ہے۔ شام پر سے پابندیاں اس لیے ہٹائیں تاکہ انہیں بحالی کا منصفانہ موقع مل سکے۔”
یاد رہے کہ 13 سالہ خانہ جنگی کے بعد شام کے سابق صدر بشار الاسد کو گزشتہ دسمبر میں حیات تحریر الشام (HTS) کی قیادت میں باغی فورسز نے اقتدار سے بے دخل کر دیا تھا۔ یہ گروہ پہلے النصرہ فرنٹ کے نام سے جانا جاتا تھا اور القاعدہ سے منسلک تھا، تاہم 2016 میں اس نے القاعدہ سے علیحدگی اختیار کرلی تھی۔
ایچ ٹی ایس 2014 سے اقوامِ متحدہ کی دہشت گرد تنظیموں کی فہرست میں شامل ہے، اور اس کے کئی رہنماؤں پر سفری، مالیاتی اور اسلحہ کی پابندیاں عائد تھیں۔ نئی قرارداد کے تحت احمد الشرع اور انس خطاب پر یہ پابندیاں ختم کر دی گئی ہیں۔
اقوامِ متحدہ کے نگرانوں نے جولائی کی رپورٹ میں کہا تھا کہ اس سال القاعدہ اور ایچ ٹی ایس کے درمیان کوئی فعال تعلقات سامنے نہیں آئے۔
چین نے قرارداد پر غیرجانب داری اختیار کی۔ اقوامِ متحدہ میں چین کے سفیر فو کانگ نے کہا کہ ان کے ملک نے ووٹنگ سے اس لیے گریز کیا کیونکہ قرارداد شام میں انسدادِ دہشت گردی سے متعلق چینی خدشات کو مناسب انداز میں تسلیم نہیں کرتی۔ چین طویل عرصے سے شام میں سرگرم ایسٹ ترکستان اسلامک موومنٹ (ETIM) کے بارے میں فکرمند ہے، جس میں ایغور جنگجو شامل ہیں۔
فو کانگ نے کہا کہ منظور ہونے والی قرارداد شام سے مطالبہ کرتی ہے کہ وہ دہشت گردی کے خلاف فیصلہ کن اقدامات کرے اور غیر ملکی جنگجوؤں، بشمول ای ٹی آئی ایم، کے خطرات سے نمٹے۔
روسی سفیر واسیلی نیبینزیا نے قرارداد کی حمایت کرتے ہوئے کہا کہ یہ فیصلہ شام کے عوام کے مفادات اور امنگوں کی عکاسی کرتا ہے۔ روس نے خانہ جنگی کے دوران بشار الاسد حکومت کو سفارتی تحفظ فراہم کیا تھا اور اکثر مواقع پر چین کے ساتھ مل کر ویٹو پاور استعمال کی تھی۔
سلامتی کونسل میں طویل تعطل کے بعد شام کے اقوامِ متحدہ میں سفیر ابراہیم علابی نے قرارداد کا خیر مقدم کرتے ہوئے کہا:
"یہ شامی عوام کے لیے پیغامِ حمایت ہے، جو اپنے وطن کی تعمیرِ نو اور زندگیوں کی بحالی کی کوشش کر رہے ہیں۔ نیا شام ایک کامیاب کہانی ہوگا — بین الاقوامی تعاون اور احترام کا روشن نمونہ۔”