کراچی، 4 نومبر 2025: دو روزہ انٹرنیشنل میری ٹائم کانفرنس 2025 کا آغاز کراچی ایکسپو سینٹر میں ہوگیا۔ یہ کانفرنس پاکستان انٹرنیشنل میری ٹائم ایکسپو اینڈ کانفرنس (PIMEC) کے ساتھ بیک وقت منعقد کی جا رہی ہے، جس کا اہتمام پاک بحریہ نے وزارتِ بحری امور کے اشتراک سے کیا ہے۔ اس میں پالیسی سازوں، ماہرینِ بحری و صنعتی امور اور بین الاقوامی تجزیہ کاروں کی بڑی تعداد شریک ہے جو عالمی بحری امور اور بلیو اکانومی سے متعلق موضوعات پر تبادلۂ خیال کر رہے ہیں۔
ڈیرہ غازی خان میں اسمگلنگ کی کوشش ناکام بس سے 30 کلو چاندی برآمد
افتتاحی تقریب کے مہمانِ خصوصی وفاقی وزیرِ خزانہ و محصولات سینیٹر محمد اورنگزیب تھے، جنہوں نے اپنے خطاب میں پاکستان کی اقتصادی بحالی اور پائیدار ترقی میں بحری شعبے کے کردار پر روشنی ڈالی۔ انہوں نے کہا کہ حکومت بلیو اکانومی کے وسیع وسائل کو قومی ترقی کے ایک کلیدی ستون کے طور پر بروئے کار لانے کے لیے پرعزم ہے۔
وفاقی وزیر نے مزید کہا کہ پبلک پرائیویٹ پارٹنرشپس کے فروغ، بندرگاہی ڈھانچے کی جدید کاری، اور علاقائی بحری تجارت میں وسعت کے ذریعے پاکستان معاشی خودمختاری کو مضبوط بنا سکتا ہے۔
اس موقع پر نیشنل انسٹی ٹیوٹ آف میری ٹائم افیئرز (NIMA) کے صدر (نامزد) ریئر ایڈمرل جاوید اقبال (ر) نے مندوبین کو خوش آمدید کہا اور ایسے فورمز کی اہمیت پر زور دیا جو حکومت کو میری ٹائم پالیسی سازی اور حکمتِ عملی کی منصوبہ بندی میں رہنمائی فراہم کرتے ہیں۔
کانفرنس کے پہلے روز سینئر نیول افسران، اسکالرز اور ماہرینِ بحری امور نے “پائیدار ترقی کے لیے بلیو اکانومی کے وسائل سے استفادہ” کے موضوع پر مقالے اور تقاریر پیش کیں۔ ان سیشنز میں بحری سلامتی، سمندری وسائل کے مؤثر استعمال، ٹیکنالوجی میں جدت، اور بین الاقوامی تعاون کے فروغ پر تفصیلی گفتگو ہوئی۔
دو روزہ یہ کانفرنس مختلف موضوعاتی نشستوں، ماہر پینلز اور پالیسی مباحثوں پر مشتمل ہے جن کا مقصد علاقائی بحری تعاون، اقتصادی روابط اور سمندری وسائل کے پائیدار استعمال کے ذریعے ترقی کے نئے مواقع پیدا کرنا ہے۔
اس موقع پر دوست ممالک، تعلیمی و تحقیقی اداروں اور بحری صنعت سے تعلق رکھنے والے مندوبین کی بڑی تعداد شریک ہے، جو پاکستان کے علاقائی میری ٹائم تعاون کے مرکز کے طور پر ابھرتے ہوئے کردار کی عکاسی کرتی ہے۔
