کراچی، 25 اکتوبر 2025 — پاک بحریہ کے سربراہ ایڈمرل نوید اشرف نے کریکس کے اگلے مورچوں کا دورہ کرتے ہوئے آپریشنل اور جنگی تیاریوں کا تفصیلی جائزہ لیا۔ اس موقع پر پاک میرینز میں تین جدید ترین 2400 ٹی ڈی ہوورکرافٹ باضابطہ طور پر شامل کیے گئے، جو پاک بحریہ کی آپریشنل استعداد میں ایک اہم سنگِ میل قرار دیے جا رہے ہیں۔
جدید ہوورکرافٹ مختلف النوع ماحول میں مؤثر کارکردگی کی صلاحیت رکھتے ہیں، بشمول کم گہرے پانی والے، ریتیلے اور دلدلی ساحلی علاقے۔ یہ پلیٹ فارم اُن مقامات پر بھی کام کرنے کے قابل ہیں جہاں روایتی کشتیوں کی گنجائش محدود ہوتی ہے۔ زمین اور سمندر دونوں پر بیک وقت کارروائی کی یہ صلاحیت پاک میرینز کو نمایاں آپریشنل برتری فراہم کرتی ہے۔
ایڈمرل نوید اشرف نے افسران و جوانوں سے خطاب میں کہا کہ ان جدید پلیٹ فارمز کی شمولیت پاک بحریہ کی جدید خطوط پر استواری اور کریکس کے دفاع کے غیرمتزلزل عزم کی مظہر ہے۔ انہوں نے کہا کہ سمندری مواصلاتی راستوں اور میری ٹائم سیکیورٹی کا تحفظ صرف عسکری نہیں بلکہ قومی خودمختاری اور معاشی استحکام کی بنیاد ہے۔
نیول چیف نے مزید کہا کہ پاک بحریہ بحرِ ہند کے خطے میں امن و استحکام کی ضامن قوت ہے اور ملک کے دفاع کے لیے ہر لمحہ تیار ہے۔ اُنہوں نے قوم کو یقین دلایا کہ پاک بحریہ کی دفاعی صلاحیتیں ساحل سے سمندر تک ہمارے عزم کی طرح مضبوط ہیں۔
