کراچی — مبینہ پولیس تشدد سے نوجوان کی ہلاکت کے بعد 3 اے ایس آئی سمیت 7 پولیس اہلکاروں کو معطل کردیا گیا ہے۔ حکام کے مطابق واقعے کی انکوائری جاری ہے جبکہ لاش کا پوسٹ مارٹم کرانے کا حکم بھی دے دیا گیا ہے۔
ہلاک نوجوان کی شناخت عرفان کے نام سے ہوئی ہے۔ عرفان کے پڑوسی اظہر ضیا نے جیو نیوز سے گفتگو کرتے ہوئے بتایا کہ متوفی بہاولپور کا رہائشی تھا اور کراچی گھومنے کے لیے آیا ہوا تھا۔
اظہر ضیا کے مطابق عرفان کو بدھ کی صبح عائشہ منزل کے علاقے سے پولیس نے حراست میں لیا تھا، تاہم اگلے روز جمعرات کی شام عرفان کے چچا کو پولیس کی جانب سے اس کی موت کی اطلاع دی گئی۔
پولیس حکام کا کہنا ہے کہ واقعے کی مکمل تحقیقات جاری ہیں اور غفلت یا تشدد کے مرتکب اہلکاروں کے خلاف سخت کارروائی عمل میں لائی جائے گی۔