کوئٹہ (نمائندہ خصوصی) — بلوچستان کے ضلع خضدار کے علاقے زہری میں سیکیورٹی فورسز نے خفیہ اطلاعات کی بنیاد پر فتنہ الہندوستان کے خلاف بھرپور آپریشن کیا جس کے دوران 7 دہشت گرد ہلاک اور 10 زخمی ہوگئے۔
سیکیورٹی ذرائع کے مطابق زہری کے ملحقہ پہاڑی علاقوں میں دہشت گردوں کی نقل و حرکت اور موجودگی کی اطلاعات موصول ہورہی تھیں، جس کے بعد فورسز نے کارروائی کی۔
ذرائع نے بتایا کہ یہ دہشت گرد مقامی شہریوں کو ہراساں کرنے اور تخریبی سرگرمیوں میں بھی ملوث تھے۔ آپریشن کے دوران بڑی تعداد میں گراؤنڈ فورسز اور ہیلی کاپٹرز نے حصہ لیا۔
سیکیورٹی فورسز نے علاقے کو گھیرے میں لے کر دہشت گردوں کے خلاف کلیئرنس آپریشن مزید تیز کردیا ہے، جب کہ آپریشن کے دوران جدید اسلحہ اور مواصلاتی آلات بھی استعمال کیے جارہے ہیں۔