برازیل کے اسٹار فٹبالر نیمار ایک بار پھر قومی ٹیم سے باہر ہوگئے ہیں اور اگلے ہفتے چلی اور بولیویا کے خلاف ہونے والے ورلڈ کپ کوالیفائرز میں حصہ نہیں لیں گے۔ کوچ کارلو اینسیلوٹی نے پیر کے روز اعلان کردہ 23 رکنی اسکواڈ سے نیمار کو ڈراپ کردیا، جس کی وجہ گزشتہ ہفتے ان کے ٹانگ کے پٹھوں میں ہونے والی معمولی انجری کو قرار دیا گیا۔
انٹر میامی کا فیصلہ گیم ڈے پر ہوگا میسی اور البا کی دستیابی مشکوک
برازیل پہلے ہی 2026 ورلڈ کپ کے لیے کوالیفائی کرچکا ہے، تاہم نیمار کی عدم دستیابی ان کی تقریباً دو سالہ بین الاقوامی غیر حاضری کو مزید بڑھا دے گی۔ انہوں نے آخری بار اکتوبر 2023 میں پیلی جرسی پہنی تھی جب گھٹنے کی سنگین انجری کا شکار ہوئے تھے۔
اینسیلوٹی نے کہا، "یہ آخری دو میچز بہت مشکل ہوں گے، ہمیں مکمل فٹنس والے کھلاڑیوں کی ضرورت ہے۔ ہم سب جانتے ہیں کہ نیمار کون ہیں اور وہ کیا کر سکتے ہیں، لیکن ہمیں ان کی بہترین حالت میں ضرورت ہے تاکہ وہ قومی ٹیم کی صحیح طرح مدد کر سکیں۔”
33 سالہ نیمار نے سعودی عرب سے واپسی کے بعد اپنے بچپن کے کلب سینٹوس میں شمولیت اختیار کی، جہاں وہ اس سیزن میں 19 میچوں میں 6 گول کرچکے ہیں۔ تاہم، گزشتہ اتوار کو واسکو کے ہاتھوں 6-0 کی شکست کے بعد میدان چھوڑتے وقت ان کا روتے ہوئے باہر جانا ان کے جاری چیلنجز کو نمایاں کرتا ہے۔
اینسیلوٹی کے اعلان کردہ اسکواڈ میں ایلیسن، مارکوین ہوس اور کیسمیرو جیسے تجربہ کار کھلاڑیوں کے ساتھ ساتھ نوجوان اسٹارز ایسٹیواو (چیلسی) اور لوکاس پیکیٹا (ویسٹ ہیم) کی واپسی شامل ہے۔
برازیل کا 23 رکنی اسکواڈ:
گول کیپرز: ایلیسن (لیورپول)، بینٹو (النصر)، ہیوگو سوزا (کورنتھینز)۔
مدافعین: الیکسسینڈرو ریبیرو (لیل)، الیکس ساندرو (فلیمنگو)، کائیو ہینرک (موناکو)، ڈگلس سانتوس (زینٹ)، فابریسیو برونو (کروزئیرو)، گیبریل ماگالہیس (آرسنل)، مارکوین ہوس (پی ایس جی)، وینڈرسن (موناکو)، ویسلے (روم)۔
مڈفیلڈرز: آندرے سانتوس (چیلسی)، برونو گوماریس (نیو کیسل)، کیسمیرو (مانچسٹر یونائیٹڈ)، جوئلٹن (نیو کیسل)، لوکاس پیکیٹا (ویسٹ ہیم)۔
فارورڈز: ایسٹیواو (چیلسی)، گیبریل مارٹینیلی (آرسنل)، جواؤ پیڈرو (چیلسی)، کائیو جارج (کروزئیرو)، لوئیز ہنریک (زینٹ)، میتھیس کنہا (مانچسٹر یونائیٹڈ)، رافینہا (بارسلونا)، رچرلیسن (ٹوٹنہم)۔