کراچی — وطنِ عزیز پاکستان کے 78ویں جشنِ آزادی کے موقع پر کراچی واٹر اینڈ سیوریج کارپوریشن میں قومی پرچم کشائی کی شاندار اور پُروقار تقریب منعقد ہوئی، جس کا مقصد آزادی کی خوشیوں کو ملی جذبے اور قومی یکجہتی کے ساتھ منانا تھا۔ تقریب کے مہمانِ خصوصی سی ای او واٹر کارپوریشن احمد علی صدیقی تھے، جن کے ہمراہ ادارے کے اعلیٰ حکام، افسران اور ملازمین کی بڑی تعداد نے شرکت کی۔
شرکاء نے پرچم کشائی کے موقع پر وطن سے محبت اور قربانی کے جذبے کا اظہار کیا۔ اس موقع پر سی ای او احمد علی صدیقی نے پوری قوم کو جشنِ آزادی کی دلی مبارکباد پیش کرتے ہوئے کہا کہ یہ دن ہمیں یاد دلاتا ہے کہ ہمارے بزرگوں نے بے شمار قربانیوں کے بعد پاکستان کا خواب حقیقت میں بدلا۔ انہوں نے کہا کہ یہ دن صرف نعرے لگانے کا نہیں بلکہ عملی خدمت اور محنت کا تقاضا کرتا ہے۔
احمد علی صدیقی نے کہا کہ پانی ہر گھر تک پہنچانا ادارے کی بنیادی ذمہ داری ہے، اس لیے تمام افسران و ملازمین اپنی ڈیوٹی کو ایک مشن سمجھ کر انجام دیں۔ انہوں نے عہد کیا کہ کراچی میں فراہمی و نکاسی آب کے نظام کو مزید بہتر بنانے کے لیے ہر ممکن اقدام کیا جائے گا۔
سی ای او نے کہا کہ کراچی اور ملک کی ترقی کے لیے سب کو متحد ہو کر کام کرنا ہوگا تاکہ آنے والی نسلوں کو ایک خوشحال اور ترقی یافتہ پاکستان ملے۔ تقریب کے اختتام پر ملکی سلامتی، ترقی اور خوشحالی کے لیے خصوصی دعائیں کی گئیں۔
