محکمہ توانائی سندھ کے زیر اہتمام تھرکول انرجی بورڈ کے دفتر میں جشنِ آزادی اور معرکۂ حق کے حوالے سے ایک پروقار تقریب کا انعقاد کیا گیا، جس میں صوبائی وزیر توانائی سید ناصر حسین شاہ نے کیک کاٹ کر تقریب کا باقاعدہ افتتاح کیا۔
یومِ شہداء پولیس ڈی آئی جی ٹریفک آفس کراچی میں شہداء کو خراجِ عقیدت قرآن خوانی و دعاؤں کا اہتمام
تقریب سے خطاب کرتے ہوئے ناصر شاہ نے کہا کہ:
"یہ محکمہ توانائی کی جانب سے جشنِ آزادی اور معرکۂ حق کے حوالے سے دوسری باضابطہ تقریب ہے، جس پر ہمیں فخر ہے۔”
انہوں نے مزید کہا کہ جشنِ آزادی اور معرکۂ حق دونوں ہی پوری پاکستانی قوم کے لیے باعثِ فخر ہیں، اور ملک بھر میں ان تقریبات کو جوش و جذبے کے ساتھ منایا جا رہا ہے۔
ناصر شاہ نے بتایا کہ چیئرمین پاکستان پیپلز پارٹی بلاول بھٹو زرداری اور وزیراعلیٰ سندھ کی خصوصی ہدایات پر صوبے بھر میں دو ہزار سے زائد تقریبات کا انعقاد کیا جا رہا ہے، جن کا مقصد عوام میں حب الوطنی، یکجہتی اور شہداء کی قربانیوں کو خراج تحسین پیش کرنا ہے۔
انہوں نے کہا کہ وزیراعلیٰ سندھ کی قیادت میں صوبائی حکومت کی پوری ٹیم ان تقریبات میں سرگرمی سے شریک ہے، اور تمام محکمے وقتاً فوقتاً جشنِ آزادی اور معرکۂ حق کے حوالے سے مختلف تقریبات کا اہتمام کر رہے ہیں۔
"محکمہ توانائی ان تقریبات کا آغاز سب سے پہلے کرکے سبقت لے چکا ہے”، انہوں نے فخر سے کہا۔
تقریب میں رکن صوبائی اسمبلی قاسم سراج سومرو، ایم ڈی تھرکول انرجی بورڈ طارق علی شاہ، سی ای او سندھ ٹرانسمیشن اینڈ ڈسپیچ کمپنی سلیم شیخ اور دیگر افسران و ملازمین نے شرکت کی۔ شرکاء نے حب الوطنی کے جذبے کے ساتھ قومی ترانے، ملی نغمے، اور شہداء کو خراج عقیدت پیش کیا۔
یہ تقریب سندھ حکومت کی اس وسیع تر حکمتِ عملی کا حصہ ہے جس کے تحت یومِ آزادی اور معرکۂ حق کو قومی وحدت، امن، اور شہداء کی قربانیوں کی یاد تازہ کرنے کے طور پر منایا جا رہا ہے۔