راولپنڈی (اسٹاف رپورٹر) منشیات کے خلاف قومی سطح پر مربوط کارروائیوں کے لیے انٹر ایجنسی ٹاسک فورس (IATF) کا 19واں اجلاس اے این ایف ہیڈکوارٹرز راولپنڈی میں منعقد ہوا۔ اجلاس کی صدارت چیئرمین IATF میجر جنرل عبدالمعید ہلال امتیاز (ملٹری) نے کی۔
ڈسٹرکٹ سٹی پولیس کی کارروائیاں، 9 گٹکا/ماوا سپلائرز گرفتار، 52.9 کلو گرام ممنوعہ مواد برآمد
اجلاس میں ڈائریکٹر جنرل پاکستان کوسٹ گارڈز میجر جنرل جواد ریاض، ڈی جی پاکستان میری ٹائم سیکیورٹی ایجنسی ریئر ایڈمرل شہزاد اقبال (ستارہ امتیاز ملٹری)، ایڈیشنل آئی جی خیبر پختونخوا محمد علی بابا خیل سمیت وفاقی و صوبائی اداروں کے اعلیٰ افسران نے شرکت کی۔
تقریب کے آغاز میں چیئرمین IATF نے اداروں کے مابین تعاون اور رابطوں کو مزید مؤثر بنانے کی ضرورت پر زور دیا تاکہ ملک بھر میں منشیات کے خلاف فیصلہ کن جنگ کو تقویت دی جا سکے۔
سیکرٹری IATF بریگیڈیئر سید عمران علی نے منشیات کی بین الاقوامی اور داخلی اسمگلنگ، آئس (میتھ ایمفیٹامائن) جیسے خطرناک نشوں کے پھیلاؤ، اور موجودہ چیلنجز پر تفصیلی بریفنگ دی۔
اجلاس میں تعلیمی اداروں میں انسدادِ منشیات مہم 2025-26 اور پوسٹ تلفی مہم کے لیے مشترکہ حکمت عملی پر اتفاق کیا گیا۔
اس کے ساتھ ساتھ معلومات کے تبادلے، مشترکہ آپریشنز، اور اہلکاروں کی تربیت کے لیے واضح لائحہ عمل وضع کیا گیا۔
اجلاس کے دوران اداروں کے درمیان باہمی اشتراک بڑھانے کے لیے مفاہمتی یادداشتوں (MoUs) پر بھی دستخط کیے گئے۔
چیئرمین IATF میجر جنرل عبدالمعید ہلال نے اپنے اختتامی کلمات میں کہا کہ اس اجلاس کی کامیابی صرف معیاری گفتگو نہیں، بلکہ ان فیصلوں پر مؤثر عمل درآمد میں ہے جو باہمی اتفاقِ رائے سے کیے گئے۔
ڈی جی اے این ایف نے تمام اسٹیک ہولڈرز پر زور دیا کہ وہ منشیات کے خلاف متحد ہوکر مشترکہ محاذ پر کام جاری رکھیں۔
