کراچی: پاکستان رینجرز (سندھ) اور پولیس نے ایک مشترکہ اسنیپ چیکنگ کے دوران کراچی کے علاقے اتحاد ٹاؤن سے دو ملزمان کو گرفتار کیا ہے جو چوری اور اسٹریٹ کرائم کی متعدد وارداتوں میں ملوث تھے۔ گرفتار ملزمان کی شناخت صفدر اور منظور احمد کے طور پر ہوئی ہے۔
لکی مروت: سیکیورٹی فورسز کی گاڑی کے قریب خوفناک دھماکہ، گاڑی مکمل تباہ
گرفتاری اور برآمدگی کی تفصیلات
گرفتار ملزمان کے قبضے سے ایک عدد 9 ایم ایم پسٹل بمعہ ایمونیشن، ایک عدد میگزین، تالے کاٹنے والا کٹر اور ایک عدد موبائل فون برآمد ہوا ہے۔ ملزمان نے انڈسٹریل ایریا اتحاد ٹاؤن میں راہزنی اور فیکٹریوں سے سامان چوری کرنے کی وارداتوں میں ملوث ہونے کا اعتراف کیا ہے۔
قانونی کارروائی اور عوامی اپیل
گرفتار ملزمان کو اسلحہ، ایمونیشن اور مسروقہ سامان سمیت مزید قانونی کارروائی کے لئے پولیس کے حوالے کر دیا گیا ہے۔ رینجرز نے عوام سے اپیل کی ہے کہ وہ ایسے عناصر کے بارے میں فوری طور پر اطلاع دیں تاکہ ان کی گرفتاریاں کی جا سکیں۔ اطلاعات رینجرز کی ہیلپ لائن 1101، رینجرز چیک پوسٹس یا واٹس ایپ نمبر 03479001111 پر بھی دی جا سکتی ہیں۔ اس میں آپ کا نام صیغہ راز میں رکھا جائے گا۔