کراچی (رپورٹ:) — صوبائی وزیر اطلاعات سندھ، شرجیل انعام میمن نے حیدرآباد-سکھر موٹروے کو قومی سطح کا اہم منصوبہ قرار دیتے ہوئے وفاقی حکومت پر شدید تنقید کی ہے۔ انہوں نے کہا کہ یہ منصوبہ نہ صرف سندھ بلکہ پورے پاکستان کے لیے اہم ہے کیونکہ کراچی پورٹ سے پورے ملک کی امپورٹ اور ایکسپورٹ ہوتی ہے، اور اس کا کوئی متبادل راستہ موجود نہیں۔
حکومتی اداروں پر الزام، اورنگی کے ٹاؤن میونسپل کمشنر آغا فہد معطل
شرجیل میمن کے مطابق، وزیراعلیٰ سندھ نے اس منصوبے کی اہمیت اجاگر کرتے ہوئے متعدد بار وفاق کو خطوط اور یاد دہانیاں بھیجی ہیں۔ حالیہ دنوں میں بعض وفاقی وزراء نے سندھ حکومت کو یقین دہانی کروائی کہ اس منصوبے کے لیے فنڈز مختص کیے جا رہے ہیں، تاہم زمینی حقائق اس کے برعکس ہیں۔
انہوں نے کہا کہ منصوبے کے لیے جو رقم مختص کی گئی ہے، وہ صرف "ٹوکن منی” ہے، جو کہ نہایت ناکافی ہے۔ "اس نوعیت کے اہم منصوبوں کے لیے صرف علامتی رقم نہیں رکھی جاتی بلکہ مکمل فنڈنگ دی جاتی ہے۔ اگر یہ منصوبہ دو سے تین سال پر محیط ہے تو کم از کم 30 سے 40 فیصد بجٹ مختص کیا جانا چاہیے تھا،” شرجیل انعام میمن نے کہا۔
انہوں نے مزید کہا کہ 15 ارب روپے رکھ کر نہ صرف اس منصوبے کے ساتھ ناانصافی کی گئی ہے بلکہ قومی مفاد کو بھی نظر انداز کیا گیا ہے۔ انہوں نے وفاق پر الزام عائد کیا کہ کے فور (K-IV) منصوبے کے لیے بھی جو رقم رکھی گئی ہے، وہ بہت کم ہے، جس پر سندھ حکومت کو شدید تحفظات ہیں۔
شرجیل میمن نے کہا کہ پیپلز پارٹی ان معاملات کو سنجیدگی سے لے رہی ہے اور بجٹ کا تفصیلی جائزہ لیا جا رہا ہے۔ انہوں نے وزیراعظم کو تجویز دی کہ غیر ضروری اخراجات میں کمی کی جائے تاکہ وسائل کو بہتر طریقے سے استعمال کیا جا سکے۔
انہوں نے کہا کہ جب آمدنی میں اضافہ نہ ہو تو اخراجات پر قابو پانا ناگزیر ہو جاتا ہے۔ ایف بی آر کی گزشتہ کارکردگی پر بھی سوال اٹھاتے ہوئے کہا کہ مقررہ اہداف حاصل نہیں ہو سکے، جس سے مالیاتی دباؤ میں اضافہ ہوا۔ اگر یہی رویہ برقرار رہا تو ملک کی مالیاتی پالیسی پائیدار نہیں رہ سکے گی۔