کراچی: نیوپلیکس سنیماز میں پاکستانی ہارر فلم "دیمک” کے شاندار پریمیئر پر شوبز کے ستاروں، فلمی نقادوں اور میڈیا کی بڑی تعداد نے شرکت کی۔ ہدایتکار رافع راشدی کی اس فلم کو بے حد سراہا گیا اور اسے پاکستانی ہارر سینما کے لیے ایک سنگ میل قرار دیا گیا۔
کراچی میں نویں بار زلزلے کے جھٹکے محسوس، شدت 3 ریکارڈ
یہ فلم عائشہ مظفر کی تحریر کردہ ایک سپرنیچرل ہارر کہانی ہے جو پوشیدہ رازوں اور ذہنی صدمات پر مبنی ہے۔ مرکزی کرداروں میں سونیا حسین، فیصل قریشی، سمینہ پیرزادہ، جاوید شیخ اور دیگر معروف فنکار شامل ہیں۔ پریمیئر کے دوران تمام شرکاء نے فلم کی منفرد کہانی، اعلیٰ اداکاری اور خوفناک مناظر کو پاکستان میں ہارر صنف کی ترقی کے لیے ایک مثبت قدم قرار دیا۔
سونیا حسین نے کہا کہ انہیں ہارر فلموں میں کام کرنے کا ہمیشہ انتظار تھا اور "دیمک” ایک خاص پروجیکٹ ہے جس پر تمام اداکاروں نے دل لگا کر محنت کی ہے۔ فیصل قریشی نے فلم کو ہارر صنف میں نئے معیار کے طور پر پیش کیا، جبکہ ہدایتکار رافع راشدی نے کہا کہ فلم معاشرتی مسائل اور ذہنی صحت جیسے موضوعات کو خوفناک انداز میں اجاگر کرتی ہے۔
ایگزیکٹو پروڈیوسر سید مراد علی نے کہا کہ "دیمک” مکمل پاکستانی فلم ہے اور یہ قوم کے لیے ایک تحفہ ہے۔ لیجنڈری اداکارہ سمینہ پیرزادہ نے بھی فلم کی گہرائی اور جذباتی پہلوؤں کو سراہا۔
دیمک اب عید الاضحیٰ پر ملک بھر کے سینما گھروں میں ریلیز کے لیے تیار ہے، جہاں اسے باکس آفس پر شاندار کامیابی کی توقع ہے۔
