سندھ سالڈ ویسٹ مینجمنٹ بورڈ کے ایم ڈی طارق علی نظامانی کی قیادت میں عیدالاضحیٰ کے موقع پر آلائش کے مؤثر اور منظم انتظام کے لیے ایک تربیتی ورکشاپ منعقد کی گئی۔ اس تربیت میں ساتوں اضلاع کے سپروائزرز اور افسران نے حصہ لیا جہاں صفائی کے جدید طریقہ کار، عوامی آگاہی اور ویسٹ مینجمنٹ کے مختلف پہلوؤں پر تفصیلی تبادلہ خیال کیا گیا۔
طارق علی نظامانی نے کہا کہ ہر ضلع کی خصوصیات اور آبادی کے مطابق آپریشنز کو بہتر بنانے، فیلڈ عملے اور شہریوں کے ساتھ تعلقات کو مضبوط بنانے پر توجہ دی جا رہی ہے۔ انہوں نے اس بات پر زور دیا کہ مسائل کے حل کے لیے مربوط حکمت عملی اختیار کرنا معاشرتی ترقی کا ضامن ہے۔ مسلسل تربیت اور مانیٹرنگ سے صفائی کے معیار میں بہتری اور عوامی رویے میں تبدیلی ممکن ہوئی ہے جو شہر کو صاف ستھرا رکھنے میں معاون ثابت ہوگی۔
ایگزیکٹو ڈائریکٹر آپریشن غلام عباس میمن نے بھی اس موقع پر تربیتی عمل کی تفصیلات بیان کیں جبکہ موٹیویشنل اسپیکر اور کنسلٹنٹس نے بھی اپنے تجربات سے کارکنان کو روشناس کرایا۔