ٹیسلا کو 2025 کی پہلی سہ ماہی میں شدید مالی مشکلات کا سامنا کرنا پڑا ہے، جہاں کمپنی کی فروخت میں 20 فیصد اور منافع میں 70 فیصد سے زیادہ کمی دیکھی گئی ہے۔ ماہرین کے مطابق اس کی ایک بڑی وجہ ایلون مسک کا وائٹ ہاؤس کے ساتھ سیاسی تعلق ہے، جس پر دنیا بھر میں تنقید اور احتجاج جاری ہے۔
کیا ہم گندم جلا دیں کسان اتحاد کا گندم بحران پر حکومت سے سخت شکوہ
منگل کو جاری کی گئی مالیاتی رپورٹ کے مطابق ٹیسلا کی آمدنی 21 ارب ڈالر کی متوقع سطح سے گر کر 19.3 ارب ڈالر پر آ گئی۔ کمپنی نے اعتراف کیا ہے کہ بدلتے ہوئے سیاسی حالات اور تجارتی پالیسیوں نے فروخت اور طلب پر گہرا اثر ڈالا ہے۔
ایلون مسک اس وقت ٹرمپ انتظامیہ میں ایک اہم کردار ادا کر رہے ہیں، جہاں وہ ’ڈپارٹمنٹ آف گورنمنٹ ایفیشینسی‘ (ڈوگے) کی سربراہی کرتے ہیں۔ انہوں نے تسلیم کیا کہ حکومتی ذمہ داریوں نے ان کی توجہ ٹیسلا سے ہٹا دی ہے، مگر آئندہ مہینے سے وہ ہفتے میں صرف ایک یا دو دن حکومتی امور پر صرف کریں گے۔
مسک نے بتایا کہ وہ تجارتی پالیسی میں زیادہ ٹیرف کے خلاف ہیں اور چین سے آنے والے پرزوں پر محصولات سے ٹیسلا کی سپلائی چین متاثر ہوئی ہے، حالانکہ زیادہ تر گاڑیاں امریکا میں اسمبل کی جاتی ہیں۔
ٹیسلا کا کہنا ہے کہ دنیا بھر میں اس کے خلاف جاری بائیکاٹ کی مہم، خاص طور پر مسک کی سیاسی وابستگی کے بعد، مستقبل میں طلب کو مزید متاثر کر سکتی ہے۔ سرمایہ کاروں کو بھی متنبہ کیا گیا ہے کہ موجودہ ’درد‘ جاری رہ سکتا ہے۔
اس دوران سرمایہ کاروں کے اعتماد میں کمی دیکھی گئی ہے، اور کمپنی کے شیئرز رواں سال 37 فیصد تک گر چکے تھے۔ تاہم نتائج کے بعد گھنٹوں کی ٹریڈنگ میں ان میں 5 فیصد کا اضافہ دیکھنے میں آیا۔
تجزیہ کاروں کے مطابق، مسک کے ٹرمپ کے ساتھ قریبی تعلقات اور تجارتی تنازعات کی وجہ سے ٹیسلا کو نہ صرف سپلائی چین کے مسائل کا سامنا ہے بلکہ عالمی سطح پر اس کی ساکھ بھی متاثر ہو رہی ہے۔