کراچی شارع فیصل پر ایک ڈمپر کی ویڈیو وائرل ہوئی جس میں ڈرائیور نہ صرف ٹریفک قوانین کی کھلم کھلا خلاف ورزی کرتا دکھائی دیا بلکہ ٹریفک پیٹرولنگ کار کی روکنے کی کوشش کے باوجود ڈمپر نہیں روکا اور فرار ہو گیا۔
موچکو چیک پوسٹ پر بڑی کارروائی 50 ملین روپے مالیت کے اسمگل شدہ موبائل فونز اور ڈیوائسز برآمد، دو ملزمان گرفتار
واقعے کے بعد تمام ڈمپنگ ایسوسی ایشنز کو فوری ہدایت جاری کی گئی کہ وہ مذکورہ ڈمپر اور ڈرائیور کو پولیس کے حوالے کریں تاکہ مقدمہ درج کر کے قانونی کارروائی کی جا سکے۔ تاہم، ڈمپر ایسوسی ایشن کے صدر لیاقت محسود اور دیگر عہدیداران پہلے وقت مانگتے رہے، اور بعد ازاں اپنے وعدے سے منحرف ہو گئے۔ نتیجتاً نہ ڈرائیور پیش کیا گیا اور نہ ہی ڈمپر۔
پولیس اور ٹریفک حکام نے سخت ایکشن لیتے ہوئے گزشتہ رات ایک وسیع کریک ڈاؤن کا آغاز کیا، جس کے نتیجے میں 142 ڈمپروں کو چالان کیا گیا اور بھاری جرمانے عائد کیے گئے۔ 27 ڈمپروں کو ضبط کر لیا گیا جبکہ ایک ڈرائیور کو گرفتار کیا گیا جس کے خلاف 1965 کے موٹر وہیکلز آرڈیننس کی دفعات 99/113 کے تحت قانونی کارروائی کی گئی۔
حکام نے واضح کیا ہے کہ یہ کارروائیاں تب تک جاری رہیں گی جب تک خلاف ورزی کرنے والا اصل ڈمپر اور اس کا ڈرائیور پولیس کے حوالے نہیں کیا جاتا۔ قانون سے کوئی بھی بالاتر نہیں اور سب کو ملکی قانون کے سامنے جوابدہ ہونا ہوگا۔