کراچی: ایم کیو ایم کے رہنما محمود مولوی نے کراچی میں مہنگائی کے بڑھتے ہوئے مسائل پر سخت تشویش کا اظہار کیا ہے اور کہا ہے کہ کراچی کے عوام کو روزمرہ کی اشیاء کی قیمتوں میں کمی کی اشد ضرورت ہے۔ انہوں نے حکومتی غفلت اور کمزور اپوزیشن پر کڑی تنقید کرتے ہوئے کہا کہ ایم کیو ایم اور پیپلز پارٹی کو بیان بازی کی بجائے کراچی کے مسائل پر توجہ مرکوز کرنی چاہیے۔
کراچی: پاکستان سنی تحریک کا اسرائیل مردہ باد مارچ — فلسطینی مظالم کے خلاف عوامی آواز بلند
محمود مولوی نے کہا کہ کراچی میں آٹے کی قیمت 70 روپے فی کلو تک پہنچ چکی ہے، مگر اس کے باوجود روٹی اور بیکری کے سامان کی قیمتوں میں کوئی کمی دیکھنے کو نہیں مل رہی، جو کہ عوام کے لیے مزید مشکلات کا باعث بن رہی ہے۔ ان کا کہنا تھا کہ جب آٹا 150 روپے فی کلو تھا، تب بھی روٹی اور بیکری کی قیمتیں اسی سطح پر تھیں، اور اب جب آٹے کی قیمت نصف ہو گئی ہے، پھر بھی عوام کو کسی قسم کا ریلیف نہیں مل رہا۔
انہوں نے مطالبہ کیا کہ روٹی، چپاتی اور بیکری آئٹمز کی قیمتوں میں 40 سے 50 فیصد کمی ضروری ہے تاکہ عوام کو سستی اشیاء دستیاب ہو سکیں۔ محمود مولوی نے حکومت پر زور دیا کہ وہ فوری طور پر عوامی مشکلات کو دور کرنے کے لیے اقدامات کرے اور وزیراعلیٰ سندھ اور گورنر سے درخواست کی کہ وہ اس سنگین مسئلے کا فوری طور پر نوٹس لیں اور عوام کو ریلیف فراہم کریں۔