ترکی میں حکومت مخالف سب سے بڑے احتجاج کی لہر

عالمی خبر رساں ادارے اے ایف پی کے مطابق، استنبول کے اپوزیشن میئر اکرم امام اوغلو کی 19 مارچ کو بدعنوانی کے الزامات میں گرفتاری کے بعد ترکی میں حکومت مخالف سب سے بڑے احتجاجی مظاہرے شروع ہو گئے ہیں۔ امام اوغلو کے حامیوں کا کہنا ہے کہ یہ الزامات جھوٹے ہیں اور انہیں سیاسی بنیادوں پر گرفتار کیا گیا ہے۔
بلوچستان میں قومی شاہراہوں پر رات کے وقت سفر پر پابندی عائد

استنبول میں لاکھوں افراد کا احتجاج

امام اوغلو کی گرفتاری کے بعد کئی راتوں تک گلی کوچوں میں احتجاج جاری رہا، جس کے بعد ان کی جماعت، ریپبلکن پیپلز پارٹی (سی ایچ پی)، نے ہفتے کے روز استنبول میں ایک بڑی ریلی منعقد کی، جس میں لاکھوں افراد نے شرکت کی۔ مظاہرین نے امام اوغلو کی فوری رہائی کا مطالبہ کیا۔

امام اوغلو کو ترکی کے صدر رجب طیب اردوان کا سب سے بڑا سیاسی حریف سمجھا جاتا ہے اور وہ 2019 اور 2024 کے استنبول کے میئر انتخابات میں اردوان کی حکمران جماعت کے امیدواروں کو شکست دے چکے ہیں۔

احتجاج کا دائرہ وسیع کرنے کی حکمت عملی

سی ایچ پی کے پارٹی لیڈر اوزغور اوزل نے اعلان کیا ہے کہ ہر ہفتے کے آخر میں ترکی کے 81 میں سے کسی ایک صوبے میں بڑا احتجاجی جلسہ ہوگا، جبکہ ہر بدھ کو استنبول کے کسی ایک ضلع میں مظاہرے کیے جائیں گے۔

اتوار کو اوزغور اوزل نے امام اوغلو کی رہائی اور جلد انتخابات کے لیے ایک دستخطی مہم کا آغاز بھی کیا۔

حکومتی کریک ڈاؤن اور صحافیوں کی گرفتاریاں

ترک حکومت نے مظاہرین کے خلاف سخت کارروائی کرتے ہوئے 1879 افراد کو گرفتار کیا، جن میں سے 260 افراد کو عدالتی کارروائی تک حراست میں رکھا گیا ہے۔

احتجاج کی کوریج کرنے والے صحافیوں کو بھی نشانہ بنایا جا رہا ہے۔ سویڈش صحافی جوآکم میڈن کو دہشت گردی اور ’صدر کی توہین‘ کے الزام میں گرفتار کیا گیا، جبکہ بی بی سی کے صحافی مارک لوون کو 17 گھنٹے حراست میں رکھنے کے بعد ملک بدر کر دیا گیا۔

بین الاقوامی ردعمل

یورپی یونین کی توسیعی کمشنر مارٹا کوس نے ترکی میں صحافیوں کی گرفتاریوں اور ملک بدری پر تنقید کرتے ہوئے کہا کہ یہ جمہوری روایات کے خلاف ہے۔ انہوں نے کہا کہ ’اجتماع کی آزادی ایک بنیادی حق ہے‘، جس کا ترک حکومت نے یورپی یونین میں شمولیت کی کوششوں کے دوران وعدہ کیا تھا۔