انجمن گجراں سندھ ڈبلیو اے ڈسٹرکٹ ایسٹ کے صدر ایڈووکیٹ محمد عرفان گجر کے ڈیرے پر مورخہ 19 فروری 2025 کو دوپہر 3 بجے ایک اہم میٹنگ منعقد ہوئی، جس میں مرکزی صدر محمد عمران گجر سمیت دیگر عہدیداران اور معزز اراکین نے شرکت کی۔
کمشنر کراچی کا ٹریفک حادثات کی روک تھام اور گراں فروشی کے خلاف اقدامات کا اعلان
میٹنگ میں مرکزی صدر نے انجمن گجراں کراچی سندھ کے سابقہ عہدیداران کی رجسٹرار آفس میں جمع کروائی گئی آڈٹ رپورٹ کو خصوصی ایجنڈے میں شامل کیا اور اس کے مشکوک نکات پر روشنی ڈالی۔ انہوں نے واضح کیا کہ آڈٹ رپورٹ میں کسی بھی قسم کے تفصیلی واؤچرز موجود نہیں، جو اس رپورٹ کی شفافیت پر سوالیہ نشان اٹھاتا ہے۔
محمد عمران گجر نے اس بات پر بھی زور دیا کہ آڈٹ رپورٹ میں ایک جعلی اے جی ایم کو یوتھ ونگ میٹنگ کے طور پر ظاہر کیا گیا، جبکہ اس اجلاس میں انجمن کے آئین کی صریحاً خلاف ورزی کی گئی۔ مزید برآں، زکات فنڈ کو مستحقین کے بجائے غیر ضروری مقامات پر استعمال کرنے کے شواہد سامنے آئے، جبکہ انجمن کے عہدیداران اور ممبران کی جانب سے اپنے ذاتی فنڈز کا کوئی ذکر آڈٹ رپورٹ میں موجود نہیں۔
میٹنگ میں یہ بھی انکشاف کیا گیا کہ لائنز ایریا آفس کی جگہ کا کرایہ رپورٹ میں شامل نہیں، اور ایک شخص کئی دہائیوں سے اس جگہ پر پانی فروخت کر رہا ہے، جس کا کوئی حساب کتاب موجود نہیں۔ زکات فنڈ کے بے دریغ اور غیر شفاف استعمال کے سبب سابقہ عہدیداران کی نیت اور قوم سے مخلصی پر بھی سوالات اٹھائے گئے۔
مرکزی صدر محمد عمران گجر نے اجلاس کے شرکاء کو تلقین کی کہ وہ زکات کی رقم انجمن کے سابقہ عہدیداران کو دینے کے بجائے مستحقین کی براہ راست مدد کریں تاکہ گجر قوم کے ضرورت مند افراد تک ان کا حق پہنچ سکے۔
انہوں نے اس امر پر بھی زور دیا کہ سابقہ عہدیداران کی مالی بے ضابطگیوں پر بازپرس کی جائے تاکہ مستقبل میں زکات فنڈ کا غلط استعمال روکا جا سکے۔
اجلاس کے اختتام پر تمام شرکاء نے گجر قوم کی ترقی و خوشحالی کے لیے دعا کی اور قوم کی خدمت کے عزم کے ساتھ میٹنگ برخاست کر دی گئی۔