کراچی – مصطفیٰ عامر کے اغواء اور قتل کیس پر سندھ کے وزیر داخلہ ضیاء الحسن لنجار نے فوری نوٹس لیتے ہوئے متعلقہ افسران کو جلد از جلد تفتیش مکمل کرنے کی ہدایات جاری کر دی ہیں۔ انہوں نے واضح کیا کہ اس معاملے میں کسی بھی غفلت، لاپروائی یا کوتاہی کو برداشت نہیں کیا جائے گا اور ذمہ داران کے خلاف سخت کارروائی عمل میں لائی جائے گی۔
پاک ترک مشترکہ انسداد دہشت گردی مشق اتاترک XIII اختتام پذیر
وزیر داخلہ کو ڈی آئی جی سی آئی اے نے کیس کی تفتیش پر تفصیلی بریفنگ دی، جس کے دوران وزیر نے تاکید کی کہ تحقیقات مکمل غیر جانبداری اور میرٹ پر کی جائیں اور تمام پہلوؤں کا بغور جائزہ لیا جائے۔ ان کا کہنا تھا کہ کوئی بھی شخص، چاہے وہ کتنا ہی بااثر کیوں نہ ہو، قانون کے دائرے میں آئے گا اور اس کیس پر مکمل نظر رکھی جا رہی ہے۔
وزیر داخلہ نے مزید کہا کہ انسداد دہشت گردی عدالت کے جج کی جانب سے جو بے ضابطگیاں سامنے آئی ہیں، ان کے بارے میں چیف جسٹس سندھ ہائی کورٹ کو مکتوب ارسال کیا جا رہا ہے تاکہ معاملے کی شفافیت کو یقینی بنایا جا سکے۔ انہوں نے عوام کو افواہوں اور من گھڑت بیانیوں پر یقین نہ کرنے کی اپیل کی اور یقین دلایا کہ انصاف کے تقاضے پورے کیے جائیں گے۔