متحدہ قومی موومنٹ پاکستان کے سینئر رہنماؤں ڈاکٹر فاروق ستار اور سید امین الحق نے اورنگی ٹاؤن میں سالانہ تبلیغی اجتماع کا دورہ کیا اور نماز جمعہ ادا کی۔ وفد میں سینئر رکن ارشاد ظفیر، شریف خان، قائد حزبِ اختلاف سندھ اسمبلی علی خورشیدی، اور اراکین اسمبلی بھی شامل تھے۔
بعد ازاں وفد نے علماء کرام اور اجتماع کے منتظمین سے ملاقات کی اور میڈیکل ایڈ کیمپس کا جائزہ لیا۔ ڈاکٹر فاروق ستار نے گفتگو کرتے ہوئے کہا کہ پُرفتن حالات میں مذہبی، مسلکی، سماجی، اور سیاسی رواداری و یکجہتی کے فروغ کی اشد ضرورت ہے۔ انہوں نے علماء کرام پر زور دیا کہ وہ شہر میں امن قائم رکھنے اور شرپسند عناصر کو بے نقاب کرنے میں مثبت کردار ادا کریں۔
انہوں نے کہا کہ ایسے اجتماعات عام شہریوں کے ذہنوں اور دلوں پر گہرے اثرات مرتب کرتے ہیں اور انہیں سماجی ہم آہنگی کا درس دیتے ہیں۔ اس موقع پر سی او سی ٹاؤن اور یوسیز کے ذمہ داران و کارکنان بھی موجود تھے۔
