بنگلہ دیش بحریہ کے سربراہ ایڈمرل محمد نظم الحسن نے نیول ہیڈکوارٹرز اسلام آباد میں سربراہ پاک بحریہ ایڈمرل نوید اشرف سے ملاقات کی۔ ایڈمرل محمد نظم الحسن امن ڈائیلاگ میں بھی شرکت کریں گے جو کثیر القومی میری ٹائم مشق امن کے ساتھ ساتھ منعقد ہو رہا ہے۔
سربراہ بنگلہ دیش بحریہ ایڈمرل محمد نظم الحسن کا نیول ہیڈکوارٹرز کا دورہ
نیول ہیڈکوارٹرز آمد پر سربراہ پاک بحریہ نے معزز مہمان کا پرتپاک استقبال کیا اور پاک بحریہ کے چاق و چوبند دستے نے گارڈ آف آنر پیش کیا۔ اس کے بعد، ایڈمرل محمد نظم الحسن نے شہداء کی یادگار پر پھولوں کی چادر چڑھائی اور نیول ہیڈکوارٹرز کے پرنسپل اسٹاف آفسرز سے ملاقات کی۔
ملاقات کے دوران دونوں ممالک کی بحریہ کے درمیان دوطرفہ تعاون، علاقائی میری ٹائم سیکورٹی، اور باہمی دلچسپی کے امور پر تفصیل سے بات چیت کی گئی۔ اس دوران تربیت، دوروں کا تبادلہ، اور دونوں بحری افواج کے درمیان دوطرفہ بحری مشقوں کے انعقاد جیسے مختلف طریقوں پر روشنی ڈالی گئی۔ نیول چیف ایڈمرل نوید اشرف نے خطے میں میری ٹائم سیکورٹی اور امن کو یقینی بنانے کے لیے پاک بحریہ کے اقدامات پر زور دیا۔ ایڈمرل محمد نظم الحسن نے خطے میں باہمی تعاون پر مبنی میری ٹائم سیکیورٹی کے فروغ میں پاک بحریہ کے کردار اور شراکت کو سراہا۔
چیف آف دی نیول اسٹاف ایڈمرل نوید اشرف نے امن ڈائیلاگ میں شرکت پر سربراہ بنگلہ دیش بحریہ کا شکریہ ادا کیا۔ یہ ڈائیلاگ خطے میں بحری سلامتی کے چیلنجز اور مواقع پر جامع بحث کو فروغ دینے کے لیے ایک اہم پلیٹ فارم ثابت ہوگا۔
چیف آف دی نیول اسٹاف کا کہنا تھا کہ بنگلہ دیش کے حالیہ دورے سے دونوں برادر ممالک کے درمیان دفاعی تعلقات مزید مضبوط اور وسیع ہوں گے۔
