اینٹی نارکوٹکس فورس (اے این ایف) نے اسلام آباد میں منشیات اسمگلنگ کے خلاف منفرد کارروائی کرتے ہوئے بیرون ملک منشیات کی اسمگلنگ کی کوشش ناکام بنا دی۔
آبپارہ مارکیٹ میں واقع کوریئر آفس میں نیوزی لینڈ کے لیے بک کیے گئے ایک پارسل کو قبضے میں لیا گیا۔ پارسل میں موجود کیرم بورڈ میں مہارت سے چھپائی گئی 1 کلو 20 گرام آئس برآمد کی گئی۔
تحقیقات کے مطابق، یہ پارسل آزاد کشمیر کے رہائشی کی جانب سے بک کروایا گیا تھا۔ اے این ایف نے منشیات قبضے میں لے کر مزید تحقیقات کا آغاز کر دیا ہے۔
منشیات اسمگلنگ کے لیے کھیلوں کے سامان کا استعمال باعث تشویش قرار دیا گیا ہے۔ اے این ایف کا کہنا ہے کہ وہ اسمگلرز کے نت نئے ہتھکنڈوں سے بخوبی آگاہ ہے اور منشیات کے خلاف اپنی جنگ پرعزم انداز سے جاری رکھے گی۔