انسداد منشیات فورس (اے این ایف) نے ملک کے مختلف شہروں میں منشیات اسمگلنگ کے خلاف چھ کامیاب کارروائیاں کرتے ہوئے چھ ملزمان کو گرفتار کر لیا۔ ان کارروائیوں کے دوران 18 کروڑ روپے سے زائد مالیت کی 131.478 کلوگرام منشیات برآمد کی گئی۔
وفاقی وزیر داخلہ سید محسن رضا نقوی کا اے این ایف ہیڈکوارٹرز کا دورہ
اسلام آباد انٹرنیشنل ایئرپورٹ پر جدہ جانے والے ایک مسافر کے پیٹ سے 84 ہیروئن بھرے کیپسولز برآمد ہوئے۔ بلوچستان کے مستونگ اور قلعہ سیف اللہ کے غیر آباد علاقوں سے 96 کلوگرام ہیروئن برآمد کی گئی۔
ایم ون موٹر وے اسلام آباد کے قریب ایک گاڑی کے خفیہ خانوں سے 3.6 کلوگرام افیون اور 21.6 کلوگرام چرس برآمد ہوئی، اور دو ملزمان کو گرفتار کیا گیا۔ سرینگر ہائی وے راولپنڈی میں بس اسٹاپ کے قریب ایک گاڑی سے 6 کلوگرام ہیروئن برآمد کی گئی، جبکہ مزید دو ملزمان کو حراست میں لے لیا گیا۔
سنگجانی ٹول پلازہ اسلام آباد کے قریب ایک اور کارروائی میں ایک ملزم سے 3.6 کلوگرام چرس برآمد کی گئی۔
تمام گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔ اے این ایف کا کہنا ہے کہ ملک کو منشیات سے پاک کرنے کے لیے ان کی کارروائیاں جاری رہیں گی۔
