اے این ایف نے ملک کے مختلف شہروں اور تعلیمی اداروں کے قریب منشیات اسمگلنگ کے خلاف کارروائیاں تیز کر دی ہیں۔ 11 مختلف کارروائیوں میں 13 ملزمان کو گرفتار کر کے 42 لاکھ روپے سے زائد مالیت کی 37 کلو گرام منشیات برآمد کی گئی۔
چلڈرن ہسپتال لاہور میں والدین کا 3 سالہ اکلوتا بیٹا گٹر میں گر کر جاں بحق
تعلیمی اداروں میں کارروائیاں
اسلام آباد میں ایک یونیورسٹی کے قریب ایک ملزم سے 90 گرام چرس برآمد ہوئی۔ ملزم نے تعلیمی اداروں کے طلباء کو منشیات فروخت کرنے کا اعتراف کر لیا۔
دیگر کارروائیاں
مانسہرہ میں جی ٹی روڈ پر ایک کار کے خفیہ خانوں سے 8 کلو گرام چرس برآمد ہوئی، ملزم گرفتار کر لیا گیا۔ برہان انٹرچینج اٹک کے قریب دو ملزمان سے 4.400 کلو گرام چرس برآمد کی گئی۔ مانسہرہ میں ایک ہوٹل کے قریب مزید 7 کلو گرام چرس برآمد ہوئی، اور ملزم کو حراست میں لے لیا گیا۔
سرگودھا میں یونیورسٹی روڈ پر دو ملزمان سے 5 کلو چرس، جبکہ گجرات کے شاہین چوک پر ایک ٹرک سے 3.6 کلو گرام چرس اور 1 کلو آئس برآمد ہوئی۔ اسلام آباد کے ایم ون ٹول پلازہ پر مسافر بس سے 4.100 کلو چرس اور 1 کلو افیون برآمد ہوئی، دو ملزمان گرفتار کر لیے گئے۔
سیالکوٹ کی وزیر آباد روڈ پر ایک ملزم سے 1 کلو افیون اور 100 گرام آئس، ڈی جی خان میں سخی سرور روڈ پر 1 کلو آئس، اور پشاور کے حیات آباد میں ایک لاوارث کار سے 1 کلو آئس برآمد ہوئی۔ ملتان کے مظفر گڑھ روڈ پر ایک ملزم سے 465 گرام آئس پکڑی گئی۔
تمام گرفتار ملزمان کے خلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
