کوئٹہ ریلوے اسٹیشن پر ہونے والے خودکش حملے کے شہداء کی نماز جنازہ کوئٹہ گیریژن میں ادا کی گئی۔ آئی ایس پی آر کے مطابق نماز جنازہ میں آرمی چیف جنرل سید عاصم منیر، وزیر داخلہ، وزیراعلیٰ اور صوبائی وزراء سمیت عسکری اور سول حکام کی بڑی تعداد نے شرکت کی۔
شہداء کی تدفین کے بعد آرمی چیف نے سی ایم ایچ کوئٹہ کا دورہ کیا، جہاں انہوں نے زخمیوں کی عیادت کی اور ان کی خیریت دریافت کی۔ اس موقع پر جنرل عاصم منیر نے دہشت گردی کے خاتمے کے لیے قوم کے عزم کو دہراتے ہوئے کہا کہ اس مشن کو اجتماعی عزم کے ساتھ جاری رکھا جائے گا۔
آرمی چیف نے اس بات پر زور دیا کہ دہشت گردی کے خلاف جنگ کے لیے قوم کی مستقل حمایت ضروری ہے اور قوم کا عزم مضبوط ہے۔ انہوں نے اس عزم کا اظہار کیا کہ دہشت گردی کو کسی صورت برداشت نہیں کیا جائے گا اور اس کے مکمل خاتمے کو یقینی بنایا جائے گا۔ آرمی چیف نے کہا کہ امن اور خوشحالی کے لیے قوم کی حمایت ناگزیر ہے۔
قبل ازیں کوئٹہ پہنچنے پر کمانڈر بلوچستان کور نے آرمی چیف کا استقبال کیا۔
