تشکر نیوز: سندھ حکومت نے نجی گاڑیوں پر سرکاری نمبر پلیٹس لگانے والوں کے خلاف کریک ڈاؤن کرنے کے احکامات جاری کر دیے ہیں۔ یہ فیصلہ سندھ کے سینئر وزیر شرجیل انعام میمن کی زیر صدارت محکمہ ایکسائز و ٹیکسیشن کے اعلیٰ سطح کے اجلاس میں کیا گیا۔
اجلاس میں شرجیل انعام میمن نے واضح کیا کہ ایسے افراد کے خلاف سخت کارروائی کی جائے گی جو سرکاری نمبر پلیٹس کو غیر قانونی طور پر اپنی نجی گاڑیوں پر لگا رہے ہیں۔
مزید برآں، سندھ حکومت نے ٹیکسیشن کے نظام میں بہتری کے اقدامات کے تحت گاڑیوں کی رجسٹریشن اور ٹرانسفر کی سہولت کو گھر بیٹھے فراہم کرنے کا بھی فیصلہ کیا ہے۔
محکمہ ایکسائز، ٹیکسیشن و نارکوٹکس کنٹرول نے اس مالی سال کے دوران سالانہ ٹیکس محصولات کا 34 فیصد صرف تین ماہ اور 23 دن میں حاصل کر لیا ہے۔ اس کامیابی کے پیش نظر، شرجیل انعام میمن نے ٹیکس ٹارگیٹس بڑھانے اور ٹیکس وصولیوں کو تیز کرنے کے احکامات بھی جاری کیے ہیں تاکہ عوامی خدمات کی فراہمی میں مزید بہتری لائی جا سکے۔