پاکستان رینجرز سندھ اور سٹی ڈسٹرکٹ پولیس نے مشترکہ انٹیلیجنس کی بنیاد پر کراچی کے علاقے لیاری میں کامیاب کارروائی کی، جس کے نتیجے میں ڈکیتی اور اسٹریٹ کرائم میں ملوث دو خطرناک ملزمان، سید جواد شاہ اور سردار محمد عرف کانیا، گرفتار کر لیے گئے ہیں۔ ملزمان کے قبضے سے اسلحہ اور ایمونیشن بھی برآمد ہوا ہے۔
ویسٹ تھانہ منگھوپیر پولیس کا منشیات فروشوں کے خلاف کریک ڈاؤن، 1.5 کلو چرس اور نقدی ضبط
تفتیش کے دوران ملزم سید جواد شاہ نے مختلف علاقوں میں اپنے ساتھیوں کے ہمراہ درجنوں ڈکیتی کی وارداتوں میں ملوث ہونے کا اعتراف کیا۔ خاص طور پر، جنوری 2022 میں ناظم آباد نمبر 2 میں پٹرول پمپ پر ڈکیتی کی واردات جس کی ویڈیو سوشل میڈیا پر وائرل ہوئی تھی، بھی اسی ملزم کی کارستانی تھی۔
دوسری طرف، ملزم سردار محمد عرف کانیا افغانی اپنے ساتھیوں امیر، سخی اور جابر افغانی کے ساتھ مل کر شہریوں کو اسلحے کے زور پر لوٹتا اور ان پر تشدد کرتا تھا۔ کچھ ماہ قبل رینجرز اور ایسٹ پولیس کی کارروائیوں کے نتیجے میں حکیم عرف چیچو گینگ کے کئی ارکان گرفتار ہوئے، جس کے بعد سردار محمد ایران فرار ہو گیا تھا۔ حال ہی میں وہ ایران سے واپس آیا اور سہراب گوٹھ کے علاقے میں لوٹ مار کی متعدد وارداتوں میں دوبارہ سرگرم ہو گیا۔
ملزمان عادی مجرم ہیں اور متعدد بار جیل جا چکے ہیں۔ انہیں مزید قانونی کارروائی کے لیے سٹی ڈسٹرکٹ پولیس کے حوالے کر دیا گیا ہے، ساتھ ہی ان کے قبضے سے برآمد ہونے والا اسلحہ اور ایمونیشن بھی پولیس کے حوالے کیا گیا ہے۔