تشکر نیوز: رات گئے ضلع کیماڑی تھانہ مدینہ کالونی پولیس نے بلدیہ نمبر 7 میں موٹرسائیکل سوار دو مسلح ملزمان کے ساتھ مقابلہ کیا۔
ایس ایس پی کیماڑی کے مطابق، ایس ایچ او تھانہ مدینہ کالونی، انسپکٹر افتخار احمد خانزادہ کی سربراہی میں پولیس پارٹی علاقے میں گشت پر تھی۔ دوران گشت، پولیس پارٹی کو بلدیہ نمبر 7 قبرستان کے قریب دو مسلح ڈکیتوں کا سامنا ہوا، جس کے نتیجے میں فائرنگ کا تبادلہ ہوا۔
ایس ایس پی انویسٹیگیشن کی سربراہی میں تھانہ قائد آباد کی شناخت پریڈ کی کارروائی
ایس ایس پی کیماڑی کیپٹن (ر) فیضان علی نے بتایا کہ فائرنگ کے تبادلے میں ایک ملزم زخمی حالت میں گرفتار کیا گیا جبکہ دوسرے ملزم کو بھی گرفتار کر لیا گیا۔ گرفتار ملزمان کی شناخت بلال ولد مقبول (زخمی) اور فرحان ولد خورشید کے ناموں سے ہوئی ہے۔
ملزمان کے قبضے سے غیر قانونی پستول اور ایمونیشن کے ساتھ ساتھ موٹرسائیکل بھی برآمد کر لی گئی۔ دوران تفتیش، ملزمان نے اسٹریٹ کرائم کی متعدد وارداتوں کا انکشاف کیا ہے۔
پولیس نے ملزمان کے خلاف مقدمات درج کر کے مزید تفتیش کا آغاز کر دیا ہے۔ ایس ایس پی کیماڑی نے کہا کہ "یہ کارروائی ملزمان کے خلاف قانونی کارروائی کو مضبوط بنانے میں مددگار ثابت ہوگی اور علاقے میں امن و امان کی صورتحال کو بہتر بنانے کے لیے ہماری کوششیں جاری رہیں گی۔”