تاجروں کے مسائل: کراچی کانفرنس میں مہنگائی، بھاری ٹیکسوں اور لوڈشیڈنگ پر تشویش

کراچی میں سندھ بزنس اینڈ ٹریڈر فورم، شعبہ تاجران مرکزی مسلم لیگ، کے زیر اہتمام تاجروں کی کانفرنس منعقد ہوئی، جس میں مہنگائی، بھاری ٹیکسوں، مہنگی بجلی اور غیر اعلانیہ لوڈشیڈنگ کے باعث کاروباری برادری کو درپیش مشکلات پر تبادلہ خیال کیا گیا۔

کانفرنس کا مقصد تاجر برادری کو ایک پلیٹ فارم پر متحد کرنا اور ان کے حقوق کے لیے آواز بلند کرنا تھا۔ تقریب سے مرکزی مسلم لیگ کے مرکزی جنرل سیکرٹری سیف اللہ قصوری، صدر سندھ فیصل ندیم، صدر کراچی احمد ندیم اعوان اور سندھ بزنس اینڈ ٹریڈر فورم کے صدر سجاد اعوان سمیت دیگر رہنماؤں نے خطاب کیا۔

مہنگائی اور ٹیکسوں سے کاروباری مشکلات میں اضافہ

سیف اللہ قصوری نے کہا کہ تاجر برادری ملکی معیشت میں اہم کردار ادا کرتی ہے، لیکن مہنگائی، کاروباری اخراجات میں اضافے اور بھاری ٹیکسوں نے تاجروں کی مشکلات بڑھا دی ہیں۔

انہوں نے کہا کہ مہنگی بجلی اور غیر اعلانیہ لوڈشیڈنگ سے کاروباری سرگرمیاں متاثر ہوتی ہیں اور پیداواری اخراجات میں اضافہ ہوتا ہے۔ ان کے مطابق ان اضافی اخراجات کا بوجھ بالآخر عام شہریوں کو بھی برداشت کرنا پڑتا ہے۔

حکومت سے ریلیف اور بجلی کی بلاتعطل فراہمی کا مطالبہ

کانفرنس کے شرکا نے حکومت سے مطالبہ کیا کہ تاجر برادری کو ریلیف دیا جائے، ٹیکس نظام آسان بنایا جائے اور بجلی کی بلاتعطل فراہمی یقینی بنائی جائے۔

سیف اللہ قصوری نے کہا کہ کاروباری سرگرمیوں کو فروغ دینے کے لیے تاجروں کو درپیش مسائل حل کرنا ضروری ہے۔ ان کے مطابق بہتر کاروباری حالات سے معاشی سرگرمیوں میں اضافہ اور روزگار کے نئے مواقع پیدا کرنے میں مدد مل سکتی ہے۔

تاجر رہنماؤں کی بڑی تعداد کی شرکت

کانفرنس میں الیکٹرانک ایسوسی ایشن کے صدر رضوان عرفان، چیئرمین مرکزی تاجران فورم جاوید صدیقی، کراچی چیمبر آف کامرس کے سابق چیئرمین ریحان حنیف، سابق چیئرمین مینجنگ کمیٹی احمد عظیم اور قاضی نعمان مجاہد سمیت مختلف تاجر رہنماؤں اور کاروباری شخصیات نے شرکت کی۔

شرکا نے تاجر برادری کو درپیش معاشی مسائل پر گفتگو کی اور کاروباری سرگرمیوں کے فروغ کے لیے مؤثر اقدامات کی ضرورت پر زور دیا۔