جوڑیا بازار میں سرکاری نرخوں سے زائد قیمت پر آٹا فروخت کرنے کے الزام میں 4 افراد کو گرفتار کر لیا گیا۔ ضلعی انتظامیہ نے خلاف ورزی کرنے والے دکانداروں پر مجموعی طور پر 3 لاکھ روپے جرمانہ بھی عائد کیا۔
کمشنر کراچی کی ہدایت پر اسسٹنٹ کمشنر آرام باغ اسامہ بن اشرف نے جوڑیا بازار میں اشیائے ضروریہ کی قیمتوں کا جائزہ لیا۔ کارروائی کے دوران مقررہ نرخوں سے زائد قیمت پر آٹا فروخت کرنے والوں کے خلاف اقدامات کیے گئے۔
اسسٹنٹ کمشنر اسامہ بن اشرف کے مطابق، سرکاری نرخوں کی خلاف ورزی پر 4 افراد کو گرفتار کیا گیا۔ خلاف ورزی کرنے والے دکانداروں پر مجموعی طور پر 3 لاکھ روپے جرمانہ عائد کیا گیا۔
انہوں نے دکانداروں کو ہدایت کی کہ اشیائے ضروریہ کی فروخت سرکاری نرخوں کے مطابق یقینی بنائیں۔ ان کا کہنا تھا کہ مقررہ قیمتوں کی خلاف ورزی کرنے والوں کے خلاف قانون کے مطابق کارروائی جاری رہے گی۔
ضلعی انتظامیہ نے واضح کیا ہے کہ شہریوں کو اشیائے ضروریہ سرکاری نرخوں پر فراہم کرنے اور قیمتوں کو کنٹرول میں رکھنے کے لیے کارروائیاں جاری رہیں گی۔
