کراچی: انسپکٹر جنرل آف پولیس سندھ جاوید عالم اوڈھو کی زیر صدارت محرم الحرام کے سیکیورٹی انتظامات کے حوالے سے اعلیٰ سطحی اجلاس منعقد ہوا۔
یہ اجلاس سینٹرل پولیس آفس کراچی میں ہوا جس میں اہلِ تشیع علماء، مشائخ، ذاکرین اور مختلف تنظیموں کے نمائندوں نے شرکت کی۔ پولیس کے سینئر افسران بھی اجلاس میں موجود تھے جبکہ کئی افسران نے ویڈیو لنک کے ذریعے شرکت کی۔
اجلاس میں ایڈیشنل آئی جیز کراچی، سی ٹی ڈی، اسپیشل برانچ، آپریشنز اور دیگر یونٹس نے سیکیورٹی پلان پر تفصیلی بریفنگ دی۔ ڈویژنل ڈی آئی جیز نے اپنے اضلاع میں انتظامات سے آگاہ کیا۔
پولیس حکام کے مطابق صوبے بھر میں 2,451 امام بارگاہوں، 18,030 مجالس، 4,369 جلوسوں اور 963 تعزیہ جلوسوں کیلئے جامع سیکیورٹی پلان تیار کیا گیا ہے۔
آئی جی سندھ نے کہا کہ محرم الحرام کے دوران سیکیورٹی کو فول پروف بنایا جا رہا ہے اور تمام حساس مقامات پر سخت نگرانی کی جائے گی۔ انہوں نے کہا کہ شرپسند عناصر پر کڑی نظر رکھی جا رہی ہے۔
اجلاس میں بتایا گیا کہ محرم سے قبل کومبنگ اور سرچ آپریشنز تیز کر دیے گئے ہیں۔ امام بارگاہوں اور جلوسوں کی گزرگاہوں پر سی سی ٹی وی کیمرے بھی نصب کیے جا رہے ہیں۔
آئی جی سندھ نے ہدایت دی کہ سوشل میڈیا پر نفرت انگیز مواد پھیلانے والوں کے خلاف فوری کارروائی کی جائے۔ انہوں نے کہا کہ ضلعی سطح پر امن کمیٹیاں فعال کی جائیں اور علماء سے مسلسل رابطہ رکھا جائے۔
انہوں نے مزید کہا کہ جلوسوں کے دوران ٹریفک پلان پر مکمل عملدرآمد یقینی بنایا جائے گا اور ایمرجنسی سروسز کی بلا تعطل رسائی کو بھی یقینی بنایا جائے گا۔
اجلاس میں اہلِ تشیع نمائندوں نے سندھ پولیس کے سیکیورٹی اقدامات پر اطمینان اور اطمینان کا اظہار کیا۔
