فیروز آباد پولیس اور شاہین فورس کا رات گئے ڈاکوؤں سے مقابلہ ہوا۔
پولیس کے مطابق مقابلہ شہید ملت روڈ کے قریب پیش آیا۔ پولیس ہاؤس رابری کی اطلاع پر جائے وقوعہ پہنچی تھی۔
پولیس کے مطابق ملزمان نے اہلکاروں کو دیکھتے ہی فائرنگ شروع کردی۔ پولیس نے جوابی کارروائی کی۔
دو طرفہ فائرنگ کے نتیجے میں ایک ملزم ہلاک ہوگیا۔ اس کے ساتھی فائرنگ کرتے ہوئے فرار ہوگئے۔
ہلاک ملزم سے اسلحہ اور موبائل فون برآمد
پولیس کے مطابق ہلاک ملزم کے قبضے سے غیر قانونی پستول برآمد ہوا۔
ملزم سے ایمونیشن اور چلیدہ خول بھی ملے۔ ایک موبائل فون بھی قبضے میں لیا گیا۔
ہلاک ملزم کی شناخت شایان ولد محمود کے نام سے ہوئی۔ پولیس نے لاش کو اسپتال منتقل کردیا۔
ملزم پر 15 مقدمات درج تھے
ایسٹ پولیس کے مطابق شایان پولیس کو ہاؤس رابری اور ڈکیتی کے مقدمات میں مطلوب تھا۔
پولیس کا کہنا ہے کہ ملزم نے گزشتہ ہفتے فیروز آباد کی حدود میں ڈکیتی کی تھی۔ اس واردات کے بعد پولیس اسے تلاش کررہی تھی۔
پولیس کے مطابق ہلاک ملزم کا سابقہ ریکارڈ بھی حاصل کرلیا گیا ہے۔ اس کے خلاف مختلف تھانوں میں 15 مقدمات درج تھے۔
ان مقدمات میں رضویہ، ناظم آباد، شریف آباد، لیاقت آباد، بہادر آباد، نیو ٹاؤن اور فیروز آباد تھانے شامل ہیں۔
فرار ساتھیوں کی تلاش جاری
پولیس کے مطابق مقابلے کے بعد ضابطے کی کارروائی جاری ہے۔
فرار ہونے والے ملزمان کی تلاش بھی شروع کردی گئی ہے۔ پولیس مزید شواہد اور ملزم کے سابقہ ریکارڈ کا جائزہ لے رہی ہے۔