کراچی: ڈاکٹر وسیم قاضی کو آئندہ چار برس کے لیے جامعہ کراچی کا وائس چانسلر مقرر کردیا گیا۔
وزیراعلیٰ سندھ مراد علی شاہ کی منظوری کے بعد سیکریٹری یونیورسٹیز اینڈ بورڈز عباس بلوچ نے تقرری کا نوٹیفکیشن جاری کیا۔
ڈاکٹر وسیم قاضی گزشتہ دو برس سے کراچی میٹروپولیٹن یونیورسٹی کے وائس چانسلر کے طور پر خدمات انجام دے رہے ہیں۔ اس سے قبل وہ اقراء یونیورسٹی کے وائس چانسلر بھی رہ چکے ہیں۔
تلاش کمیٹی میں پہلی پوزیشن
جامعہ کراچی کے وائس چانسلر کے لیے قائم تلاش کمیٹی نے تین امیدواروں کو شارٹ لسٹ کیا تھا۔
سندھ ہائر ایجوکیشن کمیشن کے چیئرمین ڈاکٹر طارق رفیع کی سربراہی میں قائم کمیٹی نے ڈاکٹر وسیم قاضی کو 86 نمبر دیے۔
ڈاکٹر معظم خان نے 74 جبکہ ڈاکٹر شفیق الرحمٰن نے 71 نمبر حاصل کیے۔
وزیراعلیٰ سندھ نے جمعے کو تینوں امیدواروں سے ملاقات بھی کی، جس کے بعد ڈاکٹر وسیم قاضی کے نام کی منظوری دی گئی۔
جامعہ کراچی میں مستقل وی سی کی تقرری
جامعہ کراچی کے سابق وائس چانسلر ڈاکٹر خالد عراقی کی مدت 27 جولائی 2026 کو مکمل ہوئی تھی۔ اس کے بعد این ای ڈی یونیورسٹی کے وائس چانسلر ڈاکٹر محمد طفیل کو جامعہ کراچی کا قائم مقام وائس چانسلر مقرر کیا گیا تھا۔
جامعہ کراچی کی موجودہ ویب سائٹ پر بھی ڈاکٹر محمد طفیل کو قائم مقام وائس چانسلر درج کیا گیا ہے۔
ڈاکٹر وسیم قاضی کی تقرری کے بعد جامعہ کراچی کو چار سال کے لیے مستقل وائس چانسلر مل گیا ہے۔