کراچی: کمشنر کراچی کی ہدایت پر عبداللہ ہارون روڈ پر غیر قانونی پارکنگ کے خلاف گرینڈ آپریشن کیا گیا۔ کارروائی کے دوران 15 افراد کو گرفتار کرلیا گیا۔
آپریشن اسسٹنٹ کمشنر صدر حاظم بھنگوار کی نگرانی میں کیا گیا۔ ان کے مطابق سڑک پر غیر قانونی پارکنگ قائم کرکے شہریوں سے رقم وصول کی جا رہی تھی۔
گرفتار افراد کے خلاف مقدمات
اسسٹنٹ کمشنر صدر حاظم بھنگوار کے مطابق گرفتار افراد کے خلاف ایف آئی آر درج کرکے مقدمات قائم کرلیے گئے ہیں۔
انہوں نے کہا کہ عبداللہ ہارون روڈ پر غیر قانونی پارکنگ کے باعث شہریوں کو مشکلات کا سامنا تھا۔ کارروائی کئی گھنٹوں تک جاری رہی۔
مزید گرفتاریاں متوقع
حاظم بھنگوار نے کہا کہ غیر قانونی پارکنگ میں ملوث مزید افراد کو بھی گرفتار کیا جائے گا۔
انہوں نے واضح کیا کہ شہر میں غیر قانونی پارکنگ کسی صورت برداشت نہیں کی جائے گی۔ ان کے مطابق کارروائی کا سلسلہ جاری رکھا جائے گا۔
اسسٹنٹ کمشنر صدر نے کہا کہ شہر میں پارکنگ فیس ختم کردی گئی ہے۔ اس لیے کسی شخص یا گروہ کو شہریوں سے پارکنگ کے نام پر رقم وصول کرنے کا حق نہیں۔
