میوہ شاہ قبرستان میں رینجرز اور پولیس کا آپریشن، 3 مبینہ بھتہ خور گرفتار

کراچی: پاکستان رینجرز سندھ اور ایس آئی یو پولیس نے سائٹ ٹاؤن کے علاقے میوہ شاہ قبرستان میں مشترکہ کارروائی کی۔

رینجرز کے مطابق کارروائی خفیہ اطلاع کی بنیاد پر کی گئی۔

فائرنگ کے تبادلے میں 2 مبینہ بھتہ خور زخمی ہوگئے۔ ایک ملزم کو بغیر زخمی ہوئے گرفتار کرلیا گیا۔

تین ملزمان گرفتار

رینجرز کے مطابق زخمی ملزمان کی شناخت محمد ریحان اور طفیل احمد عرف استاد کے نام سے ہوئی۔

گرفتار ملزم کی شناخت عبدالرحیم عرف آر کے کے نام سے بتائی گئی ہے۔

زخمی ملزمان کو طبی امداد کے لیے اسپتال منتقل کیا گیا۔

بھتہ خوری اور اسٹریٹ کرائم کے الزامات

رینجرز کے مطابق گرفتار ملزمان کا تعلق لیاری کے بلال پپو اور ماما یعقوب گروہ سے ہے۔

ادارے کے مطابق محمد ریحان کباڑ مارکیٹ کے تاجروں سے بھتہ وصولی میں ملوث رہا ہے۔

اس پر بھتہ نہ دینے والوں میں خوف پھیلانے کے لیے فائرنگ کا بھی الزام ہے۔

رینجرز کے مطابق ریحان 10 ستمبر کو میراں ناکہ سے فرار کے دوران قانون نافذ کرنے والے اداروں پر ہوائی فائرنگ کے واقعے میں بھی ملوث تھا۔

دیگر وارداتوں میں ملوث ہونے کا دعویٰ

رینجرز کے مطابق عبدالرحیم عرف آر کے بھتہ خوری کے ساتھ اسٹریٹ کرائم کی وارداتوں میں بھی ملوث رہا ہے۔

طفیل احمد عرف استاد کے بارے میں رینجرز نے بتایا کہ وہ 2013 میں ایک اسٹریٹ کرمنل گروہ میں شامل ہوا تھا۔

ادارے کے مطابق طفیل بینکوں سے رقم نکلوانے والے افراد سے ڈکیتی اور دیگر اسٹریٹ کرائم کی وارداتوں میں بھی ملوث رہا ہے۔

رینجرز کا کہنا ہے کہ طفیل نے 2026 میں محمد ریحان کے کہنے پر بھتہ وصولی کے گروہ میں شمولیت اختیار کی۔

دیگر ملزمان کی گرفتاری کے لیے چھاپے

رینجرز کے مطابق گرفتار ملزمان کے دیگر ساتھیوں کی گرفتاری کے لیے چھاپے جاری ہیں۔

شہریوں سے جرائم پیشہ عناصر سے متعلق معلومات فوری طور پر متعلقہ حکام کو دینے کی اپیل کی گئی ہے۔

رینجرز نے شہریوں سے قریبی چیک پوسٹ یا ہیلپ لائن 1101 پر اطلاع دینے کا کہا ہے۔