سعودی عرب نے عراق سے کیے گئے ڈرون حملے کے بعد اپنی اہم مشرقی-مغربی تیل پائپ لائن بند کردی ہے۔ یہ پیش رفت ایسے وقت میں سامنے آئی ہے جب مشرق وسطیٰ میں جاری جنگ کے اثرات خطے کے اہم توانائی اور بحری راستوں تک پھیل رہے ہیں۔
عراق نے حملے کی ذمہ داری قبول کرتے ہوئے کہا ہے کہ ڈرون حملہ اس کے ایران سے متصل صوبے میسان سے کیا گیا۔ عراقی حکومت نے حملے کی تحقیقات شروع کردی ہیں اور صوبے میں آپریشنز کمانڈر کو عہدے سے ہٹا دیا ہے۔
تقریباً 1,200 کلومیٹر طویل یہ پائپ لائن سعودی عرب کو آبنائے ہرمز کے متبادل راستے کے ذریعے خام تیل برآمد کرنے میں مدد دیتی ہے۔ خبر رساں ادارے رائٹرز کے مطابق جہازوں کی نقل و حرکت پر نظر رکھنے والی کمپنیوں اور تجزیہ کاروں کا کہنا ہے کہ یہ پائپ لائن عالمی تیل کی رسد کے تقریباً 4 سے 5 فیصد حصے کو منتقل کرتی رہی ہے۔
سعودی وزارت خارجہ کے مطابق حملے میں بعض افراد زخمی ہوئے جبکہ تنصیبات کو بھی نقصان پہنچا۔ حکام نقصان کا جائزہ لے رہے ہیں۔
سعودی عرب نے فی الحال حملے کے جواب میں جوابی کارروائی نہ کرنے کا فیصلہ کیا ہے۔ سعودی وزارت خارجہ کے مطابق یہ فیصلہ عراقی وزیر اعظم کی اپیل کے بعد کیا گیا۔ ریاض نے کہا ہے کہ وہ پڑوسی ممالک کے خلاف عراق سے ہونے والے حملوں کو روکنے کے لیے عراقی حکومت کی کوششوں کی حمایت کرے گا۔
آغا علی: نئے گانے پر سوشل میڈیا صارفین کا ملا جلا ردعمل
سعودی عرب نے ساتھ ہی واضح کیا ہے کہ وہ اپنی خودمختاری، سلامتی اور اہم تنصیبات کے تحفظ کے لیے ضروری اقدامات کا حق محفوظ رکھتا ہے۔
خلیج تعاون کونسل نے بھی حملے کی مذمت کی ہے۔ تنظیم کے سیکریٹری جنرل جاسم محمد البدیوی نے اسے سعودی عرب کی سلامتی اور اہم تنصیبات کے لیے خطرناک اور ناقابل قبول خطرہ قرار دیا۔
یہ واقعہ ایسے وقت میں پیش آیا ہے جب یمن میں حوثی جنگجوؤں نے تیزی سے پیش قدمی کی ہے۔ حوثیوں نے بحیرہ احمر تک رسائی دینے والی آبنائے باب المندب پر کنٹرول کا دعویٰ کیا ہے۔ ان کا کہنا ہے کہ سعودی بحری جہازوں کے علاوہ دیگر کمپنیوں کے لیے سمندری آمدورفت محفوظ ہے۔
خطے میں بڑھتی کشیدگی نے عالمی تیل کی منڈی کو بھی متاثر کیا ہے۔ خام تیل کی قیمتیں 100 ڈالر فی بیرل سے تجاوز کرچکی ہیں، جس سے عالمی سطح پر مہنگائی کے خدشات مزید بڑھ گئے ہیں۔