خاران آپریشن میں سکیورٹی فورسز نے 7 دہشتگردوں کو ہلاک کردیا۔ سکیورٹی ذرائع کے مطابق کارروائی خاران کے علاقے لجے میں انٹیلی جنس معلومات کی بنیاد پر کی گئی۔
ذرائع کے مطابق فورسز نے دہشتگردوں کی موجودگی کی اطلاع پر آپریشن شروع کیا۔ کارروائی میں متعدد دہشتگرد زخمی بھی ہوئے۔
سکیورٹی ذرائع کا کہنا ہے کہ ہلاک دہشتگردوں کا تعلق فتنہ الخوارج سے تھا۔ فورسز نے دہشتگردوں کے ٹھکانوں کو بھی تباہ کردیا۔
کارروائی کے بعد ٹھکانوں سے جدید اسلحہ اور بھاری مقدار میں گولہ بارود ملا۔ فورسز نے دیگر جنگی سامان بھی قبضے میں لیا۔
ذرائع کے مطابق دو گاڑیاں اور ایک موٹرسائیکل بھی برآمد ہوئی۔ سکیورٹی فورسز نے تمام سامان قبضے میں لے لیا۔
دہشتگردوں کی مبینہ سرگرمیاں
سکیورٹی ذرائع کے مطابق ہلاک دہشتگرد خاران اور لجے میں مختلف جرائم میں ملوث تھے۔ ان پر لوٹ مار اور بھتہ خوری کے الزامات تھے۔
ذرائع کے مطابق دہشتگرد اغوا برائے تاوان اور ٹارگٹ کلنگ میں بھی ملوث تھے۔ وہ خودکش حملوں کی منصوبہ بندی بھی کررہے تھے۔
سکیورٹی فورسز نے آپریشن ردالفتنہ 3 کے تحت کارروائی کی۔ ذرائع کے مطابق بلوچستان میں دہشتگردی کے خلاف آپریشن جاری رہیں گے۔
سکیورٹی ذرائع کا کہنا ہے کہ آخری دہشتگرد کے خاتمے تک تعاقب جاری رہے گا۔ دہشتگردی کے مکمل خاتمے کے لیے تمام ضروری اقدامات کیے جائیں گے۔
محسن نقوی کی سکیورٹی فورسز کو خراجِ تحسین
وفاقی وزیر داخلہ محسن نقوی نے خاران آپریشن میں 7 دہشتگردوں کی ہلاکت پر سکیورٹی فورسز کو سراہا۔
محسن نقوی نے فورسز کی پیشہ ورانہ صلاحیتوں کی تعریف کی۔ انہوں نے کہا کہ دہشتگردی کے خلاف لڑنے والے بہادر جوان قوم کا فخر ہیں۔