کراچی: شاہین فورس اور مبینہ اسٹریٹ کرمنلز کے درمیان نیو کراچی انڈسٹریل ایریا میں ہونے والے پولیس مقابلے کی سی سی ٹی وی فوٹیج سامنے آ گئی ہے۔ پولیس کا کہنا ہے کہ مقابلے میں دو مشتبہ ڈاکو ہلاک ہوئے تھے۔
پولیس کے مطابق فوٹیج میں مبینہ ملزمان کو شاہین فورس کے اہلکاروں پر فائرنگ کرتے ہوئے دیکھا جا سکتا ہے۔ پولیس کا دعویٰ ہے کہ اہلکاروں نے پیشہ ورانہ انداز میں جوابی کارروائی کی۔
پولیس کا مؤقف
پولیس کے مطابق مقابلے کے وقت علاقے میں خواتین، بچے، بزرگ اور دیگر راہگیر بھی موجود تھے۔ حکام کا کہنا ہے کہ اہلکاروں نے احتیاط سے کارروائی کی، جس کے باعث کسی شہری کو نقصان نہیں پہنچا۔
پولیس کا کہنا ہے کہ جوابی کارروائی کے دوران دونوں مبینہ ملزمان ہلاک ہو گئے۔ واقعے سے متعلق مزید قانونی کارروائی جاری ہے۔
حکام کی جانب سے اہلکاروں کو خراجِ تحسین
پولیس کے مطابق واقعے کے بعد وزیر داخلہ سندھ اور ایڈیشنل آئی جی کراچی نے شاہین فورس کے اہلکاروں کی بروقت کارروائی کو سراہا۔ دونوں حکام نے اہلکاروں کو ان کی پیشہ ورانہ کارکردگی پر شاباش بھی دی۔
پولیس کا کہنا ہے کہ شہر میں اسٹریٹ کرائم کے خلاف کارروائیاں بدستور جاری رہیں گی۔