ذرائع کے مطابق وزیراعظم شہباز شریف رواں ہفتے ایران کا دورہ کریں گے۔ دورے کے دوران ان کی تہران میں منعقد ہونے والی تعزیتی تقریب میں شرکت متوقع ہے۔ اس کے بعد وزیراعظم ترکیہ کا بھی دورہ کریں گے۔
ذرائع کا کہنا ہے کہ وزیراعظم شہباز شریف جولائی کے پہلے ہفتے میں ایران پہنچیں گے۔ دورے کے دوران وہ تعزیتی تقریب میں شرکت کریں گے اور ایرانی قیادت سے ملاقاتیں بھی متوقع ہیں۔
ادھر مجلسِ شوریٰ اسلامی ایران کے اسپیکر محمد باقر قالیباف نے اسپیکر قومی اسمبلی ایاز صادق کے نام ایک خط ارسال کیا ہے۔ خط میں انہیں تعزیتی تقریب میں شرکت کی دعوت دی گئی ہے۔
ایرانی اسپیکر نے اپنے پیغام میں پاکستانی عوام، اسپیکر ایاز صادق اور قومی اسمبلی کے ارکان کے لیے نیک تمناؤں کا اظہار کیا۔ انہوں نے دونوں ممالک کے درمیان باہمی احترام، دوطرفہ تعاون اور دوستانہ تعلقات کو مزید مستحکم بنانے کی خواہش بھی ظاہر کی۔
ذرائع کے مطابق تہران میں تعزیتی تقریب 3 جولائی 2026 کو منعقد ہونے کا امکان ہے۔